香薰治療課程（Day 4)

我上呢個40小時嘅香薰治療師証書課程（Level 1)咁快就嚟到尾聲，好唔捨得！嗚~~~

接住落嚟只要交齊5個case studies, 再take埋個exam又冇肥佬，咁就拎到証書啦！

不過呢個course係值得讀嘅，獲益良多，對香薰精油有深入了解，又掌握到做不同產品的方法，直係40個鐘所學嘅多過自己過去一年自我摸索，買書增值。而家最重要係實踐和不斷experiment 囉！

真係服咗我位老師，要拎住又爐又煲又量杯等等好多好多做產品嘅用具、材料返嚟比我哋上堂用，真係辛苦晒！

呢兩個就係我今日嘅製成品。係根據老師比我哋嘅兩個cases, 按需要及療效，各人再mix自己嘅配方精油，之後就做出左邊嘅減壓又助消化嘅salves(應該譯作藥膏），我諗我而家萬金油都做到出嚟，哈~~~ 

右邊嘅係有消除肌肉疲勞、防抽筋、舒緩壓力的body sugar scrub in oil base。放學返到屋企有老公做大廚，我仲唔閃去沖個靚涼咩！馬上試用埋呢個產品，將自己全身磨一次，正呀！

以後屋企嘅空氣清新spray, 殺菌除臭spray, body scrub, bath salt, massage oil, body cream, gel, lotion, facial oil, shower gel, shampoo, salves都可自家製。可以純天然，唔使再買出面充滿化學成份和防腐劑嘅產品。

好期待明年三月嘅advanced course，300小時，應該會讀埋架啦！我已經叫老公儲定學費比我，哈~~~

Advanced course嘅學費係Level 1嘅三倍呀！好鬼貴耶！

Anyway, 我今日個lunch, Warm ginger chicken Baguette with salad。原來個ginger chicken係素肉嚟架！食咗三次先知！不過真係好好味，食到我上癮呀！以後要食又要專程去Delancey嗰邊，點算呀！

香薰治療課程（Day 3）

三個星期好快過咗，今明兩日又去上香薰課程。咦！一早出門就miss咗班地鐡，好彩最後都冇遲到。

首先Review 一下上兩當講過乜，之後就一邊講香薰精油嘅chemistry compounds , 一邊講解剩番落嚟嗰11隻香薰。我好怕chemistry呢part, 由細到大，化學呢科我又怕又討厭，真心冇天份係科學呢方面。

好彩聽聽下又明，每隻香薰精油有唔同嘅chemistry compounds, break down後就知道比例係點，屬於邊個family, 從而知道療效最強係邊方面。明白，即係由科學角度去了解和應用香薰精油。

到咗食lunch時間，又去番上次間小店食沙律。

嘻~~~大家冇眼花！我又食番呢個warm ginger chicken salad, 真係好鬼好味，食到停唔到咀，食完好滿足呀！今次我醒啦！冇叫咖啡，食完行過隔離街星巴巴買番杯我至愛嘅soy latte。

下午開始上堂又玩case study, 搵個同學仔做partner, 依對方需求，做一件適合對方生活style嘅product比佢，可以係cream, salve, spray, body sugar scrub, facial oil serum都可以，咁當然要加香薰精油係入面啦！

最係就要分享一下自己揀咗邊幾隻油，點解揀佢，治療focus係邊個方向，邊隻係coil oil, supporting oil and harmonizing oil, dilution 幾多%, 總之好有挑戰性，好好玩，超like ！

食完lunch後，話咁快又四個幾鐘，今日連break time都冇，好緊湊囉！明天係最係一堂啦！好唔捨得呀！

電子香薰爐

從一年前開始接觸香薰精油（essential oil)就係用傳統的蠟燭型香薰臺來燃點香薰。後來，有位研究香薰好耐嘅香港好友建議我用電子的，說比較安全，尤其係我屋企有小朋友。

一直沒的起心肝去找，有時逛街見到的電子香薰臺同樣是用熱力原理，蒸發已加進水中的香薰精油，不同處只係用電發熱而唔係蠟燭，但一樣會燒乾水，所以冇激發起我購物的神經線。

直到三星期前去上香薰治療課程，見老師所用嘅電子香薰爐。咦！呢個係我杯茶喎！恆溫設計，不用加水。於是乎又email下香港嗰好友，佢send咗一些香港那邊的網頁，內裏所賣的電子香薰爐正是這款啊！

就係咁我就上網找找，比我搵到這個同樣設計的。這款香薰爐英文叫aroma stone vaporiser, 唔使加水，直接把香薰油滴入爐上，插上電源，好快就聞到香薰氣味，而且是恆溫設計，溫度只是暖暖的，不會燙傷手，有小朋友多手亂摸都唔怕。不用加熱高溫係因為佢嘅原理唔係用高溫蒸發香薰油，而係用汽化原理。我已經用咗差不多兩星期，晩晚用通宵都冇問題，以前用蠟燭嘅就唔可以通宵用。所以我好滿意。

不過這款爐就一定要用真正香薰精油，唔可以用有雜質或fragrance oil，會壞爐架！而且fragrance oil 這些只有其味而沒有療效的香精，不聞也罷！

又有功課交!

哈~~~ 今次隻白老鼠係我位老公大人。

唔知係咪大家知我個香薫治療課程要交5個case study, 屋企三位老細輪住嚟玩病，排隊嚟做白老鼠。唔使驚，我唔會玩C你嘅。安全行先呢幾個字係香薰使用中係非常重視。Dilution稀釋時的%, 都係先試低濃度，然後先再因用後反應而調高。

好耐冇搵我相公嘅花粉惡魔，最近竟然出現。佢係咁不停打噴嚏，係控制唔到停唔到嗰一隻，一時不停咁流晒鼻水，一時又鼻塞到透唔氣到頭痛，搞咗佢兩日，成個人謝晒，成條dead fish咁。

喂！下個星期你仲要考試架！咪肥佬喎！一家大細靠你開飯，你知你位公主王子成日扮食神上身架啦！搵少d都養佢哋唔起呀！

好喇！咪話我搵你做實驗呀！我想幫下你咋！嘻~~~ 搞掂兩個cases, 仲差三隻白老鼠，偷笑中。。。

其實花粉敏感、鼻敏感、傷風感冒好多症狀都好相似，所以係選擇香薰精油上都好類同。今次我揀咗Roman Chamonile, Eucalyptus, Peppermint and Grapefruit。Blend出來的氣味也不錯。因為佢真係鼻塞到太緊要，成個人暈下暈下又頭痛，所以我就開一缸熱水，加8滴精油係熱水入面，叫佢好好浸番15分鐘。

浸完之後佢話個鼻通咗，個人放鬆咗，個頭冇咁痛，好d。瞓覺時我滴咗幾滴精油係紙巾上面，再放係佢枕頭邊，咁瞓覺都唔會鼻塞啦！

第二日佢話停咗冇噴嚏，但一早流鼻水之後就鼻塞，咁我就叫佢下午放工返屋企就滴幾滴油係紙巾上面索呀索。夜晚再浸浴。

今日第四日啦！夜晚我問佢仲浸唔浸浴，佢馬上答yes。原因係佢好番好多，係偶有不嚴重鼻塞。佢仲叫我出力d學，等佢以後唔使俾錢睇醫生。咁又唔得喎！香薰治療始終係輔助性質，有乜大單嘢都係要睇醫生囉！

活學活用

話說幾日前我屋企嘅小姐少爺都唔多C服，咁啱睇開嘅嗰位中醫伯伯又俾人迫遷，忙於搬家，攪到求救無門。

你梗係話睇西醫啦！但老實講自從睇開呢位中醫伯伯之後，我哋一家四口已經三幾年冇探過呀西醫叔叔，冇食過西藥。

Touch wood嗰句，我哋平日頂多係感冒、喉嚨痛咁！就算唔食藥，好好休息幾日，身體都會自動痊癒。好多人以為喉嚨痛一定要食抗生素（消炎藥），係唔一定架！

根據我位醫生細妹話我知，要睇下喉嚨痛係因細菌還是病毒引起。如果係病毒感染，食抗生素係冇用架！咁點分係細菌定係病毒？要做化驗，仲要等幾日先有結果。等得嚟都已經好得七七八八啦！

所以連我位醫生細妹自己一家三口感冒喉嚨痛都唔會食抗生素，其實好多醫生都係咁。咁點解佢哋又郁d就開抗生素比病人？你自己諗下啦！

講番我兩隻馬騮先！佢哋玩鼻塞和喉嚨痛，應該有d冷親。我拿拿聲拎安康嘅抗毒寶出嚟，叫佢哋一人啪兩粒，放學後臨瞓前要每次再食兩粒，之後三日就keep住一日三次，每次一粒。

我唔係賣廣告，呢隻抗毒寶真係好得。喉嚨痛一出現馬上吃，通常好快無事。最重要純天然，成分係紫錐花、橄欖葉多酚、蜂膠、桔梗、甘草、黃耆這些大自然抗生素，增強自身免疫力對抗病毒和消炎。仲有係無副作用，食咗唔會水腫唔會發吽痘。

因為佢兩位都投訴鼻塞，透唔到氣好辛苦，頭到痛埋咁話！好啦！等啊媽出手啦！等你哋榮幸咁做我嘅白老鼠，順便等我有功課交，呵~~~

Blend番隻通鼻舒緩喉嚨痛頭痛嘅複方香薰精油過你哋嘆。其實香薰治療中，對呼吸系統嘅疾病係非常有療效。今次我用咗Cypress, Eucalyptus and Grapefruit呢三隻香薰精油，揀好油就決定分量，溝埋一齊等d油merge埋一切就用得。

我預備盤熱水，加四滴blend好嘅精油入去，叫兩隻馬騮大力咁吸d蒸氣，先用口吸，覺得嗰鼻開始通就轉用鼻吸。十分鐘左右，鼻塞冇晒，通晒。第二日就將隻油溝落sunflower oil做massage oil, 幫佢哋按下個背和膊頭。

連續幾晚用幾滴油放香薰爐上薰，等空氣中都吸到，個鼻通咗自然瞓得好。如是者都第四日，兩條友已經好番晒，老虎都可以打C幾隻。

香薰治療課程（Day 2)

跟噚日一樣未夠8點就出門返學去，真係返工都冇咁勤力，不過今日有老公車就唔使去迫地鐡，正呀！（偷笑中）

個個同學仔都好乖冇遲到，準時開波上堂。我d同學仔好多都好pro架！做嘅職業都同健康呀醫療呀有關。

有䕶士、美容師、美容產品sales、賣及教人自製無添加肥皂、磨沙和蠟燭嘅workshop owner、讀緊針灸和物理治療嘅學生、仲有全班唯一嘅男生，係一個應該有60歲的Wellness Center嘅老闆。最重要係佢哋嚟上堂都好有目標，有d希望用精油係自身嘅專業上去幫助多d人，有d就希望睇下點幫助到自己嘅事業。我諗係得我呢個師奶係因為興趣走嚟讀呢個course囉！真係失禮晒，哈~~~

一個朝早Instructor教多四種香薰精油，大家個鼻都好唔得閒，左聞右聞，仲開始試下將三至五種唔同嘅精油平排hold住係手，放係鼻下面左右移動，再感受溝埋一齊後，香氣有乜變化，身體情緒上感覺上有乜影響。就係咁好快過咗四粒鐘。

嘩！終於放食晏啦！真係餓鬼C我！

冇奶油又去番噚日間三文治店架！橫掂有一個鐘lunch break, 梗係四處八下，行多幾條街搵下有乜好嘢食啦！

行下行下望到佢！就食呢間啦！

呢個就係薑汁鳮肉沙律，my lunch。真係d材料新鮮就乜都殺晒，個沙律好味到停唔到咀。鳮肉有少少薑味，但又好juicy下，加埋d沙律菜、蕃茄和roasted red pepper粒，一大碗，食到我好滿足。可惜杯coffee唔得呀！淡到水咁，失敗之作。

下午個四粒鐘同樣好快過，因為好玩囉！我哋兩人分為一組，互相interview對方，當正自己係aromatherapist，依據對方身體問題所在，不論生理或心理，用三至五種香薰精油調配一支能幫助對方舒緩或治療嘅Synergy出來。呢支synergy混合油可以mix 底油作按摩油、可以浸浴、足浴、配合毛巾冷敷熱敷等等不同方法來作出治療。

因為要合格成為certified aromatherapist(Level 1), 除咗exam要pass外，仲要交5個case studies架！所以下午呢個實習就係我哋要做嘅case study練習喇！

Break Time! 飲番支近排好hit嘅果汁smoothies醒醒腦先！又幾好飲喎！

溝完隻油出嚟就梗要解釋比老師及全班同學仔知道，你個模擬client有乜生理或心理上嘅困擾，點解你揀呢幾隻精油blend呢款Synergy比佢，對佢有乜幫助，blend嘅濃度又點決定。好鬼有挑戰性，我覺得好好玩。特別係我和另一位同學仔點名比老師讚，搞到我好鬼開心。

咁又落堂啦！三星期後另一個weekend再繼續，老師叫我哋呢三個星好好study, 消化番呢兩日所學嘅嘢，好好備課，諗下嗰5個case studies搵乜水做你client(即係白老鼠啦哈哈），仲有係日日都要拎d精油出嚟聞下feel下研究下，訓練下個嗅覺。

香薰治療課程（Day 1)

嘩！今日晨咁早起身出門返學去！係！你冇眼花睇錯，我真係幾十歲人走去玩返學，哈~~~

咪笑住！活到老學到老，難得有樣嘢我有興趣又有機會學，當增值下自己嘛！其實我幾變態，好鍾意返學上堂，尤其係對自己有興趣嘅嘢，會情緒high爆！好一個儍婆。

自從舊年用香薰精油自製潤唇膏、蚊怕水、facial oil之後，我就戀上essential oil！普通上網找找資料來吸收呢方面嘅知識已經滿足唔到我，我試過online 搵一d專業d嘅香薰課程，但好失望，係NY city係冇嘅，最近嘅學校係要去到康州，嗚~~~

咁遠！我呢d媽媽輩就冇可能啦！

直到三個月前係FB見到一個廣泛用係瑜珈人仕的品牌＂Budda Nose", 好奇click入去睇下，點知Click下click下，發現呢個品牌創辨人係一個資深香薰治療師，名叫Amy Galper, 今年年中佢開辨咗紐約首間香薰治療學校，九月尾仲由佢親自授課，開辨紐約有史以來第一個香薰治療初班，我即時開心到飛起，跳晒舞呀！

但我都好冷靜，冇癲到立即online報名兼比銀，點都要返屋企問下我位老公大人先，梗要啦！佢負責科水架嘛！哈~~~

我位相公有個優點就係無論佢位娘子come up with any crazy idea, 佢都可以清兵上身，有個勇字係心口，閉起雙眼大力支持。^^

講番今日上當先！一早仆去搭地鐡，之後又十下十下攪錯學校地址，明明知係Suffork St, 但又去咗隔離街Norfolk St, 做咗日本首相左騰又騰！

終於搵到個入口啦！街仔都軟埋！

好彩On time 冇遲到！上堂囉！

成個朝早到係講香薰歷史，有d悶悶地，但還ok!

放食晏搵到個宇宙到又好好味嘅veggie sandwich食，真係好多料架！菠菜、牛油果、sprouts、洋蔥、蕃茄、酸青瓜, 紅蘿蔔絲和roasted red pepper, 勁呀！但個麥包真係好高纖，好鞋囉！

來多杯拉花cappuccino 提提神！Perfect! 心情大好。

下午先講下如何從植物提取精油，之後開始training 我哋個鼻，講咗五隻香薰精油，一班人聞下又討論下，講出一聞首先自己覺得d精油去咗body邊part, 係情緒方面有乜感覺，仲有喚醒自己乜嘢回憶。

每個人對同一隻香薰精油感覺都唔同架！呢part好玩。

同一樣植物但不同產地，香氣、感覺可以完全不一樣。好似薰衣草，法國高山、法國和印度出產嘅可以有完全不同feeling，真係唔係做過呢個testing都唔知。有d好strong, 有d好soft 好smooth, 有d竟然好fruity, 仲有d係覺得好spicy添！

話咁快又六點放學啦！明天繼續！