2014 馬年行好運

送蛇迎馬！祝大家新一年一馬當先、馬到功成、龍馬精神、萬事如意、福至心靈，最緊要身體健康！

為咗迎接新年，我呢d C9仔真的忙到甩轆，大掃除不特止，仲要走來走去辦年貨，真的一日24小時都唔夠用。洗洗抺抺搞到手指頭都「鞋」晒！做番兩個hand mask都補唔番，扁咀中！

不過今年要讚一下我家公主和王子，最少幫手執好自己間房。而啊大小姐果然大個女，開始識幫手，仲要真係幫到手。適逢今年過年前這個星期，紐約市高中係考試週，所有高中生有一星期假，就係咁我家大小姐跟住我又學又做，學識好多新年習俗。雖然由細到大都跟佢哋講好多中國節日文化，但以往年紀細，記d 又唔記d, 而家大d 教啊大小姐真係好D, 印象深刻d 嘛！

係我決定今年要自家制蘿蔔榚時，佢馬上話要學要幫手。嘩！你要幫手我當然求之不得啦！

最後5磅半蘿蔔，所有臘腸、冬菇、蝦米和江瑤柱，全部佢一手包辦刨好及切粒。我真係做少好多，到我落鑊炒料、煮蘿蔔、開粉時，佢全程企係隔離學。最好你學識，咁我出年就將個重任交比你，哈～～～

搞咗幾粒鐘，足料蘿蔔榚上場。

年年三十晚我都會整甜湯圓食，喻意一家團圓嘛！今年都係由大小姐搓湯圓，我只負責煲糖水和煮。

另外大年初一我一定會煲一個五寶糖水，有紅棗、蓮子、百合、杞子和桂圓，都係喻意飲過之後一家人由年頭甜蜜到年尾。

今天我仲搞下新意思煲咗一個素湯，要上網睇d 高手教路，煮咗個南乳十寳齋出來。ok 食得下，係欠咗落素蠔油，否則就更正！

新正頭事事如意、大吉大利，開個靚年，全個馬年都快活無憂！

送舊迎新1314

時間過得真快！2013年就這樣流走了！那就只好更要把握現在，珍惜當下，開心迎接2014年囉！

回顧過去一年，我都有很多新嚐試啊！上了一個初級香薫治療師証書課程，好實在非常開心充裕！人生是要不斷學習，不斷吸收的。

最意外的事自己會在封咪16年後，從新再當上網上電台節目主持，好一個挑戰啊！

2014年就是要充實加愉快，一家人身體健康。

祝福大家2014事事順心。

2013 感恩節

今日係美國嘅大節日：Thankgiving Day 感恩節。

感恩節係每年11月第四個星期四，而之後嘅星期五就Black Friday Sale! 所有Dept Store, 大小商店都瘋狂大減價，折上折！全人類都進入High 爆的shopping 狀態。

近這個月學識玩couponing, 一早起身就係為咗去三大藥房掃平貨及免費貨品。點解有咁筍？ 都話Black Friday sale呀！

呢堆係我今朝掃返來的戰利品，抺手紙和Mrs. Field Cookie 買一送二, Cheerios平日成四個幾美金一盒，今日on sale加回贈後$0.79， Carmex lip balm 用埋coupon減到一蚊四支，平日差不多兩蚊支，除咗呢三樣，圖中其他產品全部係回贈後係FREE! 其實還有好多free items比人掃晒我拎唔到。

因為一早醒，下午瞓咗兩個鐘晏覺，正呀！香港嘅朋友仔可能話：「又話 Thanksgiving 要喪拼嘅，做乜瞓晏覺唔shopping?」原因係美國乜嘢大時大節都有得行街Shopping, 除咗Thankgiving 囉！咁你就知感恩節係老外心目中有幾大啦！緊要過聖誕節和新年。就好似中國人所講：「做冬大過年」。

感恩節所有shopping mall closed, 以前真係到今晚午夜踏正12點先開始Black Friday sale, 今年好多大Dept Store都提早開門，有d 下午六點、八點就開門啦！

今晚老公老友搞趴地飯局，所以今年就冇同其他親友開party 食火雞。我打算飯局完之後返屋企先上網慢慢拼，但我家位大小姐明天想飯後來個午夜shopping，我唔想去同人迫呀！好彩後尾係Highway已見勁塞車入Queens Center (回家途經的大Shopping mall），就係咁我位大小姐宣布投降返屋企上網shop。

而傳統感恩節dinner 必食菜式：火雞配cranberry sauce and pumpkin pie，所以感恩節又叫火雞節。話明老外做冬，當然餐桌上還有其他配菜，好似honey baked ham、蕃薯、薯蓉、dinner roll、green bean等等。

移民在外的中國人當然也入鄕隨俗，同樣慶祝一番，未必一定吃火雞，但一定親朋好友聚會大吃一餐。

好啦！唔講咁多，我繼續online shopping啦！哈。。。

抗毒孖寶

前幾天晚上一家四口去光顧了一家已一段時間沒去吃飯的中餐館，怎料非常後悔！原因飯後半小時，我和兒子已經肚瀉。我位大小姐更慘，嘔到七彩。

這間中餐館以前時時去，原因經濟實惠又少味精，但自從今年農歷新年光顧那一次，發現變成勁重味精後已經無再去。點解我會知有冇味精？原因自從三年半前跟隨唐安麒宇宙飲食，再加上喝排毒酵精令身體潔淨無毒素，我現在已變成味精探測器，一食到重味精的食物，個肚仔會扭住扭住痛。

當我跑了兩轉廁所時，好彩有位網友提醒我，叫我飲排毒酵精。哎呀！我真是瀉到儍，竟然忘記瘦身教主講過，食錯嘢可馬上飲排毒一哥和食抗毒寶，務求將細菌排出體外。

立即冲番60 ml 排毒一哥，之後我去多次廁所做所長，已經好好多，最少肚仔無再扭住痛。而我位大小姐就暈住咁瞓著咗。半小時後又起身再嘔一次，不過嘔完這次，她說個胃終於放鬆下來，無再頂著。

最後睡前再一人兩粒抗毒寳，第二日瞓醒已好多了！但仍然早晚飲30 ml 排毒酵精及早午晚三次，每次一粒抗毒寳。第三日基本上已康復。

有這兩件抗病毒孖寳看門口，真是醫生叔叔都少見些。尤其天氣冷，感冒菌當道時，一發現不適馬上孖寳齊出，通常都安然渡過。當然情況嚴重時仍然要探一下醫生啦！

晴天霹靂

今天重陽節，一早登高行山啊！

天氣真係超靚，藍天白雲，風都無耶！

中午之後就決定去大約45分鐘車程的一個大shopping mall血拼去。答應咗對寶貝兩星期，要兌現啦！要幫佢兩位買番d衭啦！因為著開嘅都變晒吊腳衭，好樣衰囉！

點知去到目的地真係晴天霹靂！！！

門口寫住Sunday is closed！天呀！人到癲呀！一個超大嘅mall Sunday 竟然唔開，玩咩！果斷地跳上車飛車去半小時車程嘅另一個outlet。

最後我對孖寶滿載而歸，但我竟然只係買到一條䃿，唔制呀！嗚~~~

見差不多六點，就食埋dinner至返歸啦！

呢個沙律加Grilled Salmon係我嘅！嘻...

數下手指原來我已經連續第六日，每日都有一餐係沙律。我真係瘋狂都咁。三年前嘅我係最憎食沙律架！宇宙飲食改變了我。

我位公主仲越來越擦得，呢塊petit sirloin一點也不petit, 咁鬼大塊，但佢食都冇得剩，仲食埋細佬一個mini burger, 我真係睇到O晒咀。大家咪以為左邊件肥仔只係食一個mini burger和兜apple咁簡單，佢撻咗我同佢老豆一人三分一件三文魚架！

佢兩丁友咁食法真係食窮我。仲有就係佢兩個嘅體重好快飛越我，只差less than 10 lbs, 暈。。。

重拾Blog Blog趣

九月初正忙於搬屋又病到九彩時，見到丫烏blog公告年尾摺埋，叫所有blogger想保留心血就要幫個blog搬家。當時真係媽媽聲架！我呢d電腦白痴，搬blog咁高難度嘅嘢仲唔玩C我。好彩見到d有心人係blog分享做法，研究咗一輪，最後將個blog搬咗嚟呢度，但做錯某個step, 文字和留言都過晒嚟，但d相衰咗，家陣只好慢慢upload番d相上嚟。

Anyway, 經過個多月，我反而要多謝隻丫烏，因為blogspot呢邊真係超方便又好用，好過隻丫烏多多聲，唔怪得之佢要玩完。自從兩年前丫烏upgrade之後，我已經唔多鍾意用，奈何自己2010年開始寫blog 就用佢，用開有感情，所以冇諗過搬。

兩年前開咗店之後已經無乜時間寫，舊年全年先得十幾篇。但搬完blog過嚟呢邊，一個月就已經寫到呢個數。原因係blogspot有手機app Blogger, 用手機寫blog 超方便，連相都可以upload埋，正到痺！最重要係坐車返工d時間都可以寫，唔使好似以前咁一定要開電腦，坐定定寫，呢點我超like。

識得我耐嘅blog友仔都知我係唔識中文輸入法，我每篇blog都係用手寫版逐粒逐粒寫出嚟架陰公。真係有血有汗，粒粒皆辛苦架！

發現可以用手機app寫blog之後，呢排越寫越開心，好似返番去初初寫blog嘅日子，個感覺返晒來。想當年一班係丫烏嘅blog友仔，晚晚大家四處巡blog, 鬥快做第一個留言嘅人，一齊分享生活點滴，又為減肥瘦身互撐，真係好開心。

我終於發現原來自己真係好鍾意寫嘢，好enjoy透過文字去分享，我重拾寫blog嘅樂趣。不論而家讀緊呢篇blog嘅你係舊blog友還是路經此blog嘅新朋友，都可以留個言show up下。舊blog友仔最好通知埋我你個新blog地址啦！等我catwalk 過你樹嘛！

又有功課交!

哈~~~ 今次隻白老鼠係我位老公大人。

唔知係咪大家知我個香薫治療課程要交5個case study, 屋企三位老細輪住嚟玩病，排隊嚟做白老鼠。唔使驚，我唔會玩C你嘅。安全行先呢幾個字係香薰使用中係非常重視。Dilution稀釋時的%, 都係先試低濃度，然後先再因用後反應而調高。

好耐冇搵我相公嘅花粉惡魔，最近竟然出現。佢係咁不停打噴嚏，係控制唔到停唔到嗰一隻，一時不停咁流晒鼻水，一時又鼻塞到透唔氣到頭痛，搞咗佢兩日，成個人謝晒，成條dead fish咁。

喂！下個星期你仲要考試架！咪肥佬喎！一家大細靠你開飯，你知你位公主王子成日扮食神上身架啦！搵少d都養佢哋唔起呀！

好喇！咪話我搵你做實驗呀！我想幫下你咋！嘻~~~ 搞掂兩個cases, 仲差三隻白老鼠，偷笑中。。。

其實花粉敏感、鼻敏感、傷風感冒好多症狀都好相似，所以係選擇香薰精油上都好類同。今次我揀咗Roman Chamonile, Eucalyptus, Peppermint and Grapefruit。Blend出來的氣味也不錯。因為佢真係鼻塞到太緊要，成個人暈下暈下又頭痛，所以我就開一缸熱水，加8滴精油係熱水入面，叫佢好好浸番15分鐘。

浸完之後佢話個鼻通咗，個人放鬆咗，個頭冇咁痛，好d。瞓覺時我滴咗幾滴精油係紙巾上面，再放係佢枕頭邊，咁瞓覺都唔會鼻塞啦！

第二日佢話停咗冇噴嚏，但一早流鼻水之後就鼻塞，咁我就叫佢下午放工返屋企就滴幾滴油係紙巾上面索呀索。夜晚再浸浴。

今日第四日啦！夜晚我問佢仲浸唔浸浴，佢馬上答yes。原因係佢好番好多，係偶有不嚴重鼻塞。佢仲叫我出力d學，等佢以後唔使俾錢睇醫生。咁又唔得喎！香薰治療始終係輔助性質，有乜大單嘢都係要睇醫生囉！

活學活用

話說幾日前我屋企嘅小姐少爺都唔多C服，咁啱睇開嘅嗰位中醫伯伯又俾人迫遷，忙於搬家，攪到求救無門。

你梗係話睇西醫啦！但老實講自從睇開呢位中醫伯伯之後，我哋一家四口已經三幾年冇探過呀西醫叔叔，冇食過西藥。

Touch wood嗰句，我哋平日頂多係感冒、喉嚨痛咁！就算唔食藥，好好休息幾日，身體都會自動痊癒。好多人以為喉嚨痛一定要食抗生素（消炎藥），係唔一定架！

根據我位醫生細妹話我知，要睇下喉嚨痛係因細菌還是病毒引起。如果係病毒感染，食抗生素係冇用架！咁點分係細菌定係病毒？要做化驗，仲要等幾日先有結果。等得嚟都已經好得七七八八啦！

所以連我位醫生細妹自己一家三口感冒喉嚨痛都唔會食抗生素，其實好多醫生都係咁。咁點解佢哋又郁d就開抗生素比病人？你自己諗下啦！

講番我兩隻馬騮先！佢哋玩鼻塞和喉嚨痛，應該有d冷親。我拿拿聲拎安康嘅抗毒寶出嚟，叫佢哋一人啪兩粒，放學後臨瞓前要每次再食兩粒，之後三日就keep住一日三次，每次一粒。

我唔係賣廣告，呢隻抗毒寶真係好得。喉嚨痛一出現馬上吃，通常好快無事。最重要純天然，成分係紫錐花、橄欖葉多酚、蜂膠、桔梗、甘草、黃耆這些大自然抗生素，增強自身免疫力對抗病毒和消炎。仲有係無副作用，食咗唔會水腫唔會發吽痘。

因為佢兩位都投訴鼻塞，透唔到氣好辛苦，頭到痛埋咁話！好啦！等啊媽出手啦！等你哋榮幸咁做我嘅白老鼠，順便等我有功課交，呵~~~

Blend番隻通鼻舒緩喉嚨痛頭痛嘅複方香薰精油過你哋嘆。其實香薰治療中，對呼吸系統嘅疾病係非常有療效。今次我用咗Cypress, Eucalyptus and Grapefruit呢三隻香薰精油，揀好油就決定分量，溝埋一齊等d油merge埋一切就用得。

我預備盤熱水，加四滴blend好嘅精油入去，叫兩隻馬騮大力咁吸d蒸氣，先用口吸，覺得嗰鼻開始通就轉用鼻吸。十分鐘左右，鼻塞冇晒，通晒。第二日就將隻油溝落sunflower oil做massage oil, 幫佢哋按下個背和膊頭。

連續幾晚用幾滴油放香薰爐上薰，等空氣中都吸到，個鼻通咗自然瞓得好。如是者都第四日，兩條友已經好番晒，老虎都可以打C幾隻。

大懲罰

噚晚唔知攪乜玩失眠，點知自己又捉蟲應承小王子今日送佢返學，瞓得三粒鐘都要爬起身，對小朋友要有口齒，唔呃得。

送完返學見老公之前買落咗包香腸毒物，衰肚餓又眼瞓，走去整條熱狗食，食完諗住瞓多一粒鐘先返工啦！點知。。。瞓著一陣，痛鬼醒，條腸扭住痛，好明顯話我知條香腸有味精啦！真係抵C, 攞嚟衰，呢舖仲唔係大懲罰！嗚~~~

自從呢幾年一直有飲開酵精又跟咗健康嘅宇宙飲食後，身體潔淨冇乜毒素，一食d味精重嘅毒物，條腸就好似味精探測機咁，即時扭住痛話我知。所以呢d又多味精又多防腐劑嘅嘢，都係戒食為妙！

最衰係我老公，買包咁嘢放係雪櫃，要抦過佢至得。等陣比我位醫生細妹知我食香腸又會比佢抦一劑。

最後只好乖乖啪番30ml 排毒一哥啦！

眼瞓和餓過龍都係我C穴，一遇上就好易失手亂食嘢，平日幾好意志力都消失得無形無蹤。所以如果你減緊肥，一定要知自己C穴係邊，盡力避開先唔會中地雷呀！

逛街去食免費餐

今日唔使返工，瞓到自然醒，爽呀！唔使返工就梗係陪對孖寶去下街街啦！不過首先要去Ikea return嘢，同時又要買嘢！

出發啦！小公主一見我拎起架手機就閃開唔肯上鏡，隔離件肥仔就比我偷拍咗都唔知，哈~~~

最筍係今個weekend係Ikea買滿$150，就可以食免費餐，食咗幾錢就係你買嘢張單扣番比你。

既然係咁，梗係食咗先算啦！趁仲係福利期，出下村偷食都ok啦！而且我食咗兩粒Ankang消脂甲殼寶打底。

呢件朱古力慕絲蛋糕，以前覺得好好食。今日諗住豪d quota 嚟番件，點知。。。。。好鬼甜呀！最後mousse嗰兩層只係食咗d,食晒疍榚嗰兩層就算。

係Ikea攪掂都已經差不多四點，但我位小公主仍然好想過隔離個Jersey Garden Outlet逛下。好明顯佢有target 啦！

原來佢想搵對呢排好興，墊高鞋底嘅波鞋，點知又比佢搵到對Polo減價貨，30蚊有找！呢個size係最後一對，好啦！豪比你啦！我同佢講今年內咪再叫買鞋。

查實係我見對鞋我都啱著，所以先買，哈~~~

最後5點就打道回府，lunch 咁heavy, 都係返屋企食住家飯好。今餐有小公主幫手，45分鐘就有飯開。

首先要講一下，碟韮菜花有午餐肉同炒係壞榜樣，宇宙人應該戒食罐頭食物。因為見雪櫃有佢哋食剩嘅一小件午餐肉，所以拎嚟炒鬼埋佢。我係Facebook 一post張相，馬上比我位醫生細妹抦，話我哋食午餐肉。希望咪俾瘦身教主見到啦！如果唔係可能被抦多一劑。嘻~~~

我哋全家都好鬼鍾意用蕃茄蛋湯撈飯食，最後一人一大碗。

呢一餐我有宇宙架！食韮菜花加蕃茄蛋湯撈飯。至於d排骨就比屋企三位老細搞掂佢。

中秋過後有餅食

中秋節對我家大小姐和少爺來說，應該只係知道有月餅食。雖然我曾經講過嫦娥個故事比佢哋聽，但我諗佢哋已冇乜印象。呢兩隻為食貓由迎月食到追月，連續三日每晚都食四分一件雙黃白蓮蓉月餅。暈。。。

曾經有一年返香港玩，食過九龍酒店的奶黃月餅，真係好香好好食。好多人話半島嘉麟樓嘅奶黃月餅最好食，但我仲未有緣食過囉！

中秋前搵咗兩日最後都係買唔到冰皮月餅，估唔到過咗中秋先發現今年呢邊有美心迷你奶黃月餅賣。因為已經過咗中秋，所以減價大平賣，14蚊美金盒，我立即買番盒來氹下我對孖寶。

飯後一陣，兩隻為食貓已經吼住隻月餅。好啦好啦！既然係迷你月，比你哋share一個喇！試食後佢哋話ok啦！乾咗少少，話冇係香港食嗰個咁正！梗係啦！點都冇係香港食咁新鮮。Anyway, 止咗喝先，好過冇得食呀！

今日一收工就和老公去超市和水果店上糧。搬入新屋已經兩星期，但有好多日常調味料都冇，加上又要儲番d後備糧。一買就十袋八袋咁抬返屋企。

點都好啦！最少今晚煮到餐住家飯食，唔使出街食味精。老公幫下手洗菜，唔使一粒鐘就有飯食。

呢餐絶對符合宇宙飲食架！兩碟蔬菜一碟肉，而蛋係百搭。所以宇宙飲食跟平常飲食絶對融合到，只係將肉和澱粉分開食，注意比例，七成蔬菜三成主食，就係咁簡單。

忙裏偷閒

最近因為搬屋忙到氹氹轉，面膜都冇時間敷呀陰公！再加埋病咗一劑，搞到個樣勁殘爆，連自己都唔敢照鏡。今日終於偷咗一粒鐘出嚟見見髮型師，執下一頭亂髮。

我諗都係直髮比較適合自己，方便我呢d懶人唔使點打理，比處理曲髮慳好多時間。我要補眠補眠再補眠，瞓番夠本，唔使對眼肚出嚟搶鏡。

收工返到屋企，原來老公買咗牛扒，咁就沙律配牛扒啦！一人負責整一樣，唔使半粒鐘就有得食，快靚正。要跟宇宙飲食無難度，咁又一餐喇！

中秋佳節2013

一年容易又中秋，話咁快2013年又過咗大半。人大咗，唔知點解覺得時間過得特別快。做細路仔時會覺得好耐先一年。

係外國過節都冇乜節日氣氛，最多係一家人出外食餐好嘅，飯後嘆番件月餅。呢邊無人玩燈籠，我家小姐少爺都唔知燈籠係乜，更加想像唔到乜嘢叫點蠟燭玩燈籠，仲有煲蠟呢d玩意。

今日中秋正日，我哋一家去咗食日本餐做dinner, 因為中餐館係呢d日子通常爆滿，仲會因為人多而水準飄忽。

好啦！我唔客氣啦！好明顯我今晚偷走出宇宙村啦！

食完dinner仲要拿拿聲返歸，因為我家大小姐未做完功課。做乜家陣high school咁多功課，日日放學都做到成11點，返學一個星期已經幾科要考試，想當年我嚟到美國返high school, 好鬼少功課好清閒㗎嘛！

Anyway, 沖完個靚涼，點都一家人一齊食番件月餅應下節。好掛往香港d奶皇月餅，呢邊無得賣，嗚~~~

放心，雖然我今晩出咗村，仲要夜麻麻吔件高脂高糖月餅，但我已經沖定一人一杯玫瑰草本茶，乜油膩都炸走晒。

之前未搬好屋就見到有美心的冰皮月餅賣，等我搞掂晒間屋，係唐人街搵咗幾間店都冇晒。我位為食小王子好失望，自從舊年8月返香港，佢食過人生第一件冰皮月餅之後就愛上咗，點知今年買唔到冇得食。咁只好明年請早。

At the end, 祝大家中秋節快樂，人月倆團圓。

浩大工程 (從 Yahoo Blog 到 Blogger)

雖然成功將整個yahoo blog內差不多500篇舊blog文搬過來這邊，但只有文字和留言，相片transfer失敗，嗚~~~

我有依足方法但我可能仍是電腦白痴一名，應該係"Find and Replace" 嗰個step出問題，所以有文冇相。

就係咁每日搞d, 搞咗三日先做好10%左右，呢個浩大工程有排玩。



今日休假在家，打算努力d, 點知做咗個幾鐘已經頭暈眼花，頭頂出煙，要唞一唞！

噢！有人問點將blog搬過來blogspot這邊，嗰方法我是在blog友千年女王（也加子）嗰FB Fan page內看到她的粉絲分享出來的。因為我鍾意blogspot呢邊多過tumblr那邊，所以我呢個電腦白痴就膽粗粗跟住來試。

你哋電腦知識比我好，可以試下，成功就可以將blog文、相片及留言全部搬過來架。

以下條link可以跳去那位粉絲朋友嘅blog文，睇下佢嘅方法用唔用得著。
http://tastejplife.blogspot.hk/p/blogspot.html

寶貝們的大日子

Wow, 好難想像我位小公主初中畢業，暑假後就是一位高中女生了！而我位裙腳仔小王子都小學畢業囉！我呢個做人啊媽嘅連續兩日參加佢哋個畢業禮，真係好感動呀！

首先係昨天小王子嘅畢業典禮，一早起身幫佢執番個靚仔樣先，著番叫恤衫，打番條呔，皮鞋西䃿不可少，指定畢業生打扮。

老公呢兩日請定假幫對寶貝影靚相。畢業生進入禮堂後就唱下國歌，校長致詞咁，之後就頒發各大小獎項。通常呢d時間都悶爆，我同老公已經係度玩手機，突然間聽到台上叫啊仔嗰名，我哋登時定格互望，大家都問對方有冇聽錯。（唉！呢對父母真騎里）

冇計啦！都冇諗過佢咁醒有份上台攞獎，really suprise呀！差d連相機都開唔切影底呢個重要時刻，哈~~~

至於大家問嗰個係乜獎，什麼Parent Teacher Assoication Award. R 爆頭都唔知係乜？

呢件肥仔貫徹無憂性格，一出會場，相都唔想影多幾張，呱呱嘈話肚餓叫快d去食飯。食飽竟然話要返屋企瞓晏覺，佩服佩服。

今日就輪到我位小公主行畢業典禮喇！

小公主升上初中就好似昨日的事，今日又話畢業，時間過得真係快。

因為小公主係天才班（呢邊係咁叫，即係成績全級最好嗰班），所以代表畢業班致詞嗰位女生都係來自小公主嗰班，仲要係佢嗰best friend添！

循例又到頒獎時間，但冇悶爆。雖然啊女無份上台，但佢好幾位老友仔同學都有份得獎，我老公就係咁幫人哋啊女影相，笑C。

我位小公主性格樂觀，BB時已經是個愛笑寶寶，所以由細到大都好多朋友仔，個個都好friend, 佢嘅學生哥生涯一直都好愉快，希望升上高中大學都係咁啦！

為夏天作好準備啦!

雖然最近紐約的天氣有d飄忽, 忽冷忽熱, 一個唔覺意就会中招冷親, 不過天氣在這星期也算唔錯啦!  至少有兩日下午可以著短袖tee四圍逛。係, 只係下午, 因為早晚氣温還是会冷。

睇吓呢張相就知, 左邊早上我仲要加穿一件珠冷外套, 右邊下午外出已經可以放低件外套係公司, 齋短袖tee及小背心喇!

其實我極討厭冬天, 尤其係NY呢d冰天雪地嘅冬季, 日日包到隻粽咁出街。呢個冬天叫俾面架啦!  冇乜點落過大雪。 如果大家仲記得我舊年post上來的blog及相, 去年NY不停玩暴風雪, 諗起都仲驚呀!

好啦!  終於見到花開, 春天蒲頭啦!  夏天好快到, yeah~~~

太陽伯伯實在令我又愛又恨, 見到sunny day 我個心情会特別好, 但貪覩又怕老嘅我就最怕UVA同UVB, 晒黑不特止, 最惨晒斷皮下骨膠原, 人就老得快, d皮膚仲会下垂、出皺紋及出色班, 嗚~~~ 我唔要呀! 

只好同太陽伯伯鬥法, 避開d紫外光啦!  大家要記住, 一支好嘅防晒霜比你嘅各類精華液更重要呀!  夏天就更加重要添!

一直以來都係樹揾支有效又合心水的防晒霜, 直至去年返HK時買咗支澳洲品牌的超強防晒, 是物理防晒來, 可以頂住99%紫外光, 初時心諗有冇咁堅呀! 用咗四個月, 一路都覺效果唔錯, 皮膚keep到冇點晒黑(我係嗰d好鬼易晒黑嘅人)。

上個月用晒, 呢边又冇得買, 只好用番以往的防晒霜, 最近我真係覺自已晒黑咗! 

本來小天使姊妹okokAlice話幫我係HK買, 再寄比我, 但我諗唔使咁麻煩啦!  用番以前隻頂住先, 睇吓邊個返開HK先幫我買, 但原來真係有分別。所以我上星期忍唔住已經上咗澳洲嗰邊嘅網站order, 但隔成半個地球, 唔知幾時先寄到, 好心急呀!

我都只係一個普通師奶, 覩衫靚鞋覩包包都愛, 但係護膚品係我C穴, 百發百中。嘻~~~

講開要為summer time作好準備, 瘦身中的姊妹們最近跟宇宙飲食跟成點呀?

夏天到啦!  想著小背心熱褲就要乖d, 咪亂走出村, 真係要出都要補飛, 出動@Ankang 瘦身三寶呀!  最好就跟吓教主的短期餐單, 咁就瘦得更有效果。見到最近好多小天使姊妹係微博報成績, 超替佢哋開心。好多姊妹跟教主最新設計嘅「四大天王十日餐單」成績都好好, 平均見佢哋十日可以减4-7磅, 攪到我心思思想試吓呢個餐單嘅威力。點知教主答我: 「你夠啦吓話!」

哈~~~人家兩年前入門時, 未有呢個秘笈嗎?  咪想試吓囉!  不如我食肥幾磅先再湊熱鬧囉!

嗱~~~咪掟我雞蛋話我玩嘢!  其實學識教主Angel套宇宙神功, 真係可以肥瘦由自己控制架! 

呢張係去午年Summer最熱那天拍下的背心熱褲Look!

夏天, 我ready啦!  姊妹們, 你哋ready未呀?  齊齊來準備啦!

龍年行大運

呵~~~送免迎龍!

新一年又開始啦! 

祝各位blog友day day快樂, 歲歲happy!
男嘅Chok爆, 女嘅索爆!
要升職嘅升職, 想要龍B生龍B!
荷包腫脹永無憂, 天賜良財福滿門!

上次教咗大家點樣過節吃不胖, 準備好未呀?

為咗有多d quota等我係新春呢幾日隨意吃, 前幾日我嚟咗個教主個勁爆餐單: 林志玲三日瘦身餐單。

三日減咗2.8磅, 可能我係自己身高的標準範圍已經一年半, 所以減得冇以前咁多, 以前瘦身期間, 每次跟呢個餐單都可以減刻3-3.5磅。

Anyway, 2.8磅都夠我曳曳出村食吓d年糕、蘿蔔榚、笑口棗咁啦啩! 

最重要我有瘦身三寶傍身, 隨意吃應該沒問題。睇清楚係冇宇宙嘅隨意吃, 而唔係瘋吃狂吃呀!

龍年見啦! 

小公主双重快樂的一天

昨天對我位寶貝女來說是双重快樂開心的一天。先在學校拿獎, 晚上再有全家人幫她慶祝12歲生日。

昨天我要晚一點才返工, 原因係要撐阿女塲, 到她學校幫她打氣。去年同一時間, 小公主嬴得全級Social Studies Fair(歴史科項目)比賽的第二名, 那時的我覺得她是符碌勝出。點知今年同一比賽又比佢拿了個全級第三名返來, 我開始相信我啊女真的開始有些「食」力。

昨天去到學校會塲, 真係好多人喎!  每一年級都有十幾份作品, 幾級加埋幾十件, 仲要件件成個人咁高, 塲面壯觀, 勁呀!

揾到小公主就梗係要幫她及她那件大作品影番張相留念, 順便要跟她老爹交代嘛!

今年小公主選的主題是「The Model T」, 係講述美國汽車工業歷史, Henry Ford 點樣成立Ford 這間汽車廠及他如何令汽車在當時普及化。

所有參賽者一早返到學校己經要輪住見評審及做presentation, 還要答問題啊!  到我們一眾家長到達學校時就只是四圍參觀一下, 影吓相咁啦!

到宣佈得果時, 個個参賽者都有些緊張, 連我都緊張埋一份。

最後宣佈七年級(即是中一)第三名是小公主個名, 我都替她高興, 最少她付出一個月時間去圖書館及上網找資料, 再自己一手一腳完成個project是值得的。雖然小公主話要拿第一名才有資格參選全市的Social Studies Fair, 今年又無機會去見識, 我只好鼓勵她明年再努力過。但作為媽咪的我已經好滿意她這個成績了!  享受學習過程比名次更重要, 壓力太大, 小朋友會不開心的。

到了晚上一家人出外吃飯, 原意不是慶祝小公主得獎, 而是提早為她慶祝生日, 因為正日在下星期中, 所以遷就埋其他家族成員提早幾天開心地飯聚。一枱十四人啊!  叫了十碟餸。有小公主喜愛的蒜茸粉絲蒸扇貝, 又有小王子喜愛的片皮鴨。

其實食了這兩諜再加一大堆菜, 我已經飽了一半, 其餘菜式我也只是輕嘗ｏ

到最後還有雪榚蛋榚啊!  我也吃了一件。好彩打定底, 餐前食定3粒甲殼寶, 返到屋企再啪番杯排毒酵精, 無有怕。已瘦身成功的我, 現在只是維持體重, 一星期有兩餐出村跟家人隨意吃, 絕對沒問題。

我的寶貝女生日快樂身體健康!