穿梭兩州三地的一天

呢個星期NY嘅學校放假, honey原先諗住我要返工, 請定假揍一對寶貝, 意外地連我都放埋假, 咁點呀? 一家四口成個星期放假喎! 好明顯我哋呢啲爛玩嘅人, 點會留係屋企呀!  繼昨天hea喝玩樂咗一日, 今日加強人馬再下一城, 紐約新澤西兩州穿梭。

但我好乖啊! 全日宇宙無失守, 只因過年肥咗嗰磅幾仲未消失, 唔敢亂來啊!

早餐慣例酵精加生果, 中午去咗飲茶, 揀咗菜跟澱粉類, 蝦腸飛走兩隻大蝦比小王子, 再吃件馬拉卷及兩條芫茜腸。之後一車九個人, 出發去NY Upstate一個有室內溜冰場嘅商場, 一班細嘅打算去溜冰。

塞咗一輪車, 坐咗個幾鐘至到。

入場前滿心歡喜的小公主。

唔知邊個咁抵C, 玩包場, 搞到我哋無得玩, 要等三粒鐘喎, 咪玩啦! 

你睇呢位小姐扁晒咀。

班細嘅超失望, 無冰溜, 咁轉為玩血拼啦! 

吓! 又拼!

我honey 唔放過我喎!

嗱~~~ 我無買衫又無買鞋, 但..........

我.........

買咗個..........

.....................................................

.....................................................

手袋囉! 

放心放心, 唔係名牌, 平嘢嚟啫! 只因佢有齊近期流行元素, 鍋釘加鍊帶仲要半價添!  這個嘛, 啱款又啱價, 好難忍手囉!

honey 無理我, 佢已經麻木咗喇!  

啊芝啊咗嗰個竟然係宇宙特警小公主, 佢竟然話: 「啊媽, 你又買嘢呀!」家陣唔止管我吃乜仲管埋我買乜。

後面堆牛記, 買一條第二條至半價, 呢d offer 引唔到我嘅!

悶悶哋係星巴克來番杯Latte with soy milk再加件pound cake 嘆吓!

逛咗兩嘢, 有人提議玩轉場, 去Fort Lee, New Jersey 嗰日本超市, 即時上車閃。

呢個超市前身係八佰伴, 後尾摺咗, 變成而家呢個專賣日本家庭用品, 食品及日用品嘅大超市, 仲有個吃日本快餐及小食嘅food court 咁啦!

呢兩位細路企圖敗家失敗。

呢啲豆沙餅要成US$3.30一件, 右面盒千層海棉疍糕with almond powder & rum仲貴, 嚇C我, 細細隻要US$25。

左邊啲和菓子件件都唔平, 右邊成個桃嘅係Jelly嚟! US$12食啫喱!????

我無咁癲囉!  D日本嘢靚就靚啦, 但咪又係糯米加紅豆, 唔同咗個外形囉! 雖然我愛甜品, 但呢d 唔係我杯茶, 慳番我個quota!

好喇, 連超市都逛埋, dinner有乜搞作? 有乜新意思?

本來了無搞作, 開車回程無耐, 為食嘅honey一句日本燒牛肉, 全車「塞豆loon」歡呼, 就係咁, 立即call去book 枱, 架車經林肯隧道向Manhattan Downtown 進發。

今日Monday有special, 我哋食開嗰兩隻牛肉, 半價啊!

雪花牛半價後$5.95一客。

無咁肥e隻半價後$3.25添! 

Yeah~~~ 唔使就住就住囉!

來多客窩疍牛肉石頭鍋飯。

今次有人幫我哋影全家幅啊!

飲飽食醉等埋單。

九個人吃咗兩個green salad, 兩碗 miso soup, 十四客肥牛, 兩客瘦牛, 三客雞胸肉, 再嚟多兩個石頭鍋飯。個個食力驚人, 唔係講笑。我有宇宙架, 無狂食, 只係食沙律加牛肉及石頭鍋飯入面啲菜。

就係咁, 我吔呢班儍瓜就嚟咗個紐約上州轉去新澤西州再閃番去曼哈頓下城嘅無聊一日遊喇!

返到屋企再補番個超大火龍果添!  冒住失眠後果都要嚟番杯荷葉草本茶補飛。