忙裏偷閑

今日意外地唔使返工, 立即跟埋honey佢哋團血拼大隊出發。Yeah ~~~ 返工之後有兩個月無跟大隊去shopping。今日仲要係honey嘅生日添。

但我覺得似我牛一多過honey牛一, 因為今日啊豬仔大出血, 我一個唔覺意就掃咗一條裙, 三件衫, 一件長褸再加一對長boots, 超爽呀!

最抵係對boots囉! $29.99就拎咗返屋企, 平時啲長boots好少少質素嘅, 點減都仲要六七十蚊美金架! 唯一美中不足嘅係我想買啡色但我個size得番黑色。另外仲有對短boots都好正, 減到廿二蚊有找, 點知無我個碼, 超失望。

我都話唔可以睇鞋, 一睇實會買番對返歸, 我臨走前等緊其他人去洗手間, 一轉入鞋部就出唔番來, 迷失方向, 哈~~~~~

忙裏偷閑原來係好寫意架! 啲時間好似偷返嚟咁, 就算嘆番杯咖啡都寧啥好味。

我杯Latte with soy milk, 正呀!

點都要同今日位主角影番張相嘅。喂! 啊仔, 你做乜攝入鏡頭做電燈膽。

今日買嗰條裙同身後中間個model 嗰件好似, 不過我嗰件係紫色, 裙脚係bubble style嘅, 可以就咁著, 又可以襯legging, 幾易襯, 好滿意!

走前影多張, 唔知幾時至可以再跟大隊嚟過。

返到屋企仲有一個驚喜, 收到blog友仔Mimi寄來的package。因為之前我幫咗佢一個忙, 佢寄些草本茶多謝我。

入面仲有教主本四季瘦身美肌食譜, 有錢都買唔到啊。

呢個至感動呀!

係Mimi手做嘅朱古力, 呢份心意至係無價的, 飛越半個地球至到我手啊!

其實仲有幾位小天使話要寄嘢比我, 雖然我婉拒了, 但你哋份心意我係完全地收到, 已經放在心中, 超級温暖。

千里送鵝毛, 物輕情義重。

比多張相大家睇吓!

呢嚿唔係普通嘅雪山, 睇真啲, 入面包住咗架車啊! 真係替位車主難過, 都唔知點剷番架車出嚟, 分分鐘連架車都揾唔到呀陰公。