冰天雪地

我的天啊! 又嚟19吋!

昨天場暴風雪分上下兩場, 早上先醒你4吋, 晚上七點再嚟第二波, 先落冰粒再落大雪, 今朝瞓醒已經變成咁。

對面街架車係我honey嘅, 再一次比啲雪大包圍, 仲頂住張白色勁厚大棉胎。

比起12月26日嗰場少一吋。以往紐約市每年平均下雪21吋, 加埋呢場今年已經有55吋, 比平日double有多, 今年冬天由12月中開始, 長期處於低温, 日日最高華氏30幾度, 即係HK嘅零度以下。

上次場勁嘢, 積係街角啲大雪山仲未溶晒, 我只係覺得自己每日一企出室外, 就比啲大雪山包圍住, 好似去咗北極咁, 同將自己放係冰格係完全無分別。唔係講笑, 凍都想去非洲行番轉。

還有一星期就係農歴新年, 相信HK依家人人忙於辨年貨, 蒸糕整角仔, 但NY呢邊因為天氣關係更加無新年氣氛。平日新年前一星期, 各區唐人街一定很多人, 特別weekend, 住外州嘅中國人都會開車出來買年貨, 而唐人街嘅商户會掛滿新年擺設, 供人購買, 街頭上有人賣花, 賣榚點, 賣橙等等。

但今年靜咗好多, 昨天中午與老友趁還可在風雪下出動, 走去上番些糧食, 去到Brooklyn 八大道唐人街, 人唔多, 更冇人擺檔賣年貨, 我只係見到一檔賣富貴竹。

NY既經濟已經差, 呢啲大節日咁嘅天氣, 啲人想出嚟消費都唔容易, 好似食團年飯開年飯咁, 就算book咗枱, 架車比雪冰封咗, 想食都未必出到去。只好嘆一句, 生意難做, 連個天都玩你。

我哋個好「流」嘅天文台話下星期二, 年廿九會再落雪, 希望落唔成啦!

如果唔係年初一都唔使出街拜年囉!

講起個天文台就嬲, 呢場雪初時話只係3-6吋, 後尾到噚日朝又改口話6-10吋, 最後係19吋, 呢啲預測係咪離譜咗啲喱, 叫我如何再信它!

噚日朝送完對寶貝返學, 只係飄緊啲好濕嘅雪雨, 地下係無積雪嘅。

氣温係0℃左右, 所以啲雪一落地就溶咗, 見到咁, 諗住返工都無問題啦!

返上樓執埋嗰樣, 執埋啲早餐下午茶準備出門前, 細妹call 嚟話天氣太差, 唔開門, 費事放工時無家可歸。我儍吓儍吓仲話ok, 佢叫我去窗口望吓啦!

嘩! 唔係化? 廿分鐘都無就變晒天, 地下開始積雪。

 一個鐘後我仲被困自家既driveway, 本來見樓下有位, 諗住揸番架車泊出街, 留番自家車位比honey放工返嚟泊。

點知最後我架車比啲雪啜住係driveway度, 唔上又唔落, 叫天不應叫地不聞, 最後無計可施, 只好CC氣急call honey返嚟救我, 等佢其間, 落車用剷嚐試去剷走車下嘅雪, 但都係無功而回, 仲搞到成身濕晒, 今日周身骨痛添呀陰公。

廿分鐘後honey返到來, 攪咗十幾分鐘, 終於泊咗架車出來。樹下架車咪我嗰囉!

場雪落到二點鐘左右開始停落嚟, 我心諗好囉, 落幾吋好啦!

點知到準備dinner期間先再嚟第二波, 呢波至勁呀! 落到密麻麻, 可以用瘋癲來形容, 半夜三點起身仲落緊。今日清晨六點, honey call去熱線中心, 全市學校停課, 可以安心大覺瞓。

搞笑嘅係到八點九, 對寶貝衝入我房大叫唔知醒起身返學, 當我話佢哋知落大雪停課, 佢兩隻大懶蟲開心到彈吓彈吓咁返去房玩。

中午前我honey唔想好似上一場雪咁, 架車被雪冰封一星期, 見樓下自己門口前有個吉位, 想移架車返過嚟, 最後拖埋對寶貝落樓展開呢個浩大工程。 

先由車尾動工。

小公主及小王子就負責剷走嗰吉位上嘅雪, 等架車易啲泊入去。

移師車頭位置, 剷呀剷, 呢個艱巨嘅任務唔係咁易完成。 

咦! 有啲成績囉喎! 見番個車身。

經過四十五分鐘努力, 總算大功告成, 聽日返工返學都無問題啦!

原先個車位就留咗個"大菇燶"係樹。

唔好以為收得工, 仲有我架車吖, 佢三位掃走晒車上嘅雪, 免得又好似上次咁凍C埋舊電池要破財。之後佢哋再移師去屋後自己個車位, 再努力趁啲雪仲軟未變硬時, 剷得幾多得幾多, 唔係明晚收工返嚟冇位泊就弊家伙。

前前後後用咗個幾鐘, 終於完工, 辛苦晒三位。

你哋係咪諗緊我做乜唔幫手, 我無出外面剷雪, 但我無愉懶, 我係樹好努力咁幫間屋企大掃除啊!  再唔趁呢幾日搞掂埋, 點過年呀!