開心之旅(三)

Day 2 嘅晚餐順應一對寶貝嘅要求, 又係食buffet, 但係我哋揸車閃過咗另一間酒店Showboat Casnio, 佢哋二樓嗰間French Quarter Buffet, 係所有大西洋城酒店buffet中較有水準, 昨晚嗰間就話賭場俾優惠買一送一啫, 要俾錢就揀間好少少囉, 橫掂都係貴幾蚊啫。

開餐前同honey影番張相先。

好, 出去望吓有乜好嘢食。繞場一週, 哇哇哇, 真係比昨晚個間多好多選擇喎!

小公主食到佢恨咗好耐嘅buffet, 連笑到笑得甜啲, 至於隔離呢位哥仔唔係係樹發誓, 佢係想同大家講呢碟係佢嘅第三碟。暈得。

食到半飽, 走去望吓個甜品區, 我即時知我衰硬, 實在太多太多甜品疍糕, 仲要好靚仔吓!  啲甜品疍榚不斷咁同我揮手, 叫我行埋去帶佢返位度慢慢嘆。

Tiramisu, cranberry cake, carrat cake, 各式cream tart

眼花撩亂嘅colorful cupcake, lemon pie, apple pie

香濃朱古力疍糕, 最右邊係New York Cheese Cake & Cherry Cheese Cake

十款不同味道嘅雪榚仲有好多topping任你加。

我拎到一碟都係, 樣樣都想試, 我仲飲埋杯機製嘅cappuccino。

下面得丁丁咁少嘅係Cherry cheese cake嚟, 拎咁少唔係唔好食, 就係太好食喇, 我怕我成件隊, 所以只係食少少, 勁滑, 好正, 配coffee一流。

其他嗰三件都好正, 但我邊有咁大個膽食晒佢哋呀! 每件食啲試吓味, 但我無浪費食物, 我叫對寶貝試吓呢幾件先, 鍾意先好出去攞一件。 佢哋幫我清晒, 咁佢哋唔使同一款再拎多次返來, 可以試其他嗰啲。

雖然食buffet 已經比晒錢, 但我唔準佢哋浪費食物, 一路以來都係教佢哋食buffet第一轉出去拎食物, 有興趣嘅攞少少, 食過好味又鍾意先好再拎多啲, 絕對唔準貪心, 攞埋一大碟篤兩吓又話唔食。

雖知食物珍貴, 世界上有好多人未能餐餐温飽。我哋幸運至有得選擇, 要學懂感恩。

佢哋精挑細選每樣一件, 大家share來食!

小王子嗰笑容又出賣咗佢, 但呢件cupcake真係食得一半, 佢話啲cream好甜, 全部係糖, 仲一粒粒好似沙咁係啲cream度, 叫我千祈咪食, 得個靚字, 浪費quota。

另一位食家話佢呢件brownie好得, 朱古力味濃, 個面脆脆哋, 底層又軟熟。

個個食力驚人, 我停咗半粒鐘, 佢哋仲嘆緊。

嘩! 今餐個個咁食法, 仲得掂, 拿拿聲叫啊侍應生哥仔俾一壺hot water嚟, 一人隊番一杯荷葉草本茶, 聽日炸番晒啲嘢出嚟!

食足兩粒鐘, 一定回本。哈~~~

Day 3 明天再續。