紐約美容美髮展

昨天一早起身梳洗, 準備放低對寶貝返學就立即會合老友, 出發去紐約一年一度嘅大型美容美髮展(International Beauty Show)。呢個show每年都係Manhattan 的Jacob Javits Convention Center舉行, 一連三日。

今年嘅入場費同去年一樣係US$85。舊年我跟老友要比錢入塲, 今年唔使錢, 因為老友個honey今年變成參展商, 我哋可以用員工pass入塲, 呵~~~  好開心啊!

昨天係最後一天, 去到時大約十點, 立即四圍八吓先!  舊年同樣last day入場, 嚇C我, 幾年無嚟, 個場靜咗好多, 人又少咗。

相對今年個show好番好多, 咁先似樣嘛!  參展商多番, 入場既人又多啲, 感覺熱鬧好多。唔通美國嘅經濟真係開始好轉。

場內分兩個區, 美髮用品區及美容產品區。

先嚟講講美髮區先, 呢邊好大又好嘈, 因為有強勁嘅music, 再加埋有好多場即席剪髮染髮嘅表演睇。

Show Time!

即塲表演剪髮, 報名就有免費hair stylist幫你design番個新髮型。

美髮產品琳琅滿目, 多到眼花, 有啲牌子仲未聽過, 而hair salon內需要嘅產品好似梳, 髮卷, 風筒, 剪刀, 髮夾等一應俱全, 一律批發價發售。

而美容產品區就較靜喇! 可以慢慢行慢慢睇。

今年發現多咗好多黄金面膜係樹做推廣。

其中呢一檔將塊黄金mask剪成一小塊比人試, 我同老友梗係唔執輸, 拎一塊敷咗係手背, 咦! 聞落個味有啲似老友去年係HK買番嚟嗰隻黄金面膜喎!

再聽吓個seller講乜, 24K黄金骨膠原面膜喎!  聽佢講咗一輪, 望吓個手背先!

 唓! 無乜料到, 無白到又冇潤到。但個價錢就真係搞到我哋兩位師奶O晒咀囉! 

大家估吓一盒四塊, 個零售價係幾多錢???

比10秒大家.............................

10............................9....................

8..............................7..................

6..............................5..................

4.............................3...................

2............1..............

係美金150蚊呀! 

唔係化?

如果我係消費者, 呢塊mask敷完, 唔該要比我覺得一夜傳奇, 如果唔係, 我會大嗌回水兼擲雞疍。

個seller仲好似醒你咁, 話係show入面批發價50蚊一盒, 好抵! 

咪玩啦! 我老友係HK買番嚟嗰隻仲掂過呢隻, 但零售價係一張變七張喎! 唯一分別係呢張厚啲啲囉!

仲有一檔sell 黄金mask, 批發價50蚊10張, 但我同老友都無興趣, 去年都玩咗喇。

Show入面真係所有美容院及Spa店所需要嘅儀器, 用品, accessories都有齊, 做呢行嘅一年一次嚟入貨, 真係會慳番好多。

啊妹知我嚟行show, 落order叫我幫佢買化粧掃, 行咗好幾間, 都係決定買貴啲嗰間, 因為係用山羊毛做嘅, 靚好多及柔軟好多, 最緊要咪甩毛。價錢比其他嘅貴一倍, 但好嘅掃可以襟用啲, 條數一樣啫。

連指甲店做腳甲spa嘅椅都有得賣。

呢間咪我上年買過眼睫毛增長液嗰間囉!  即係幫大家做團購嗰隻呀!

今年多番seller做即場示範, 你唔怕樣衰瞓低, 可以做番個免費facial 架!

但今年唔見有最新嘅減肥纖體機做推廣, 有啲失望。

口服羊胎素及减肥丸都有, 你夠唔夠膽試吖!  咪搞我!

呢間人頭湧湧嘅係來自匈牙利嘅有機護膚品牌, 袁彌明係youtube有介紹過佢哋其中八種嘅水果mask。

 我同老友撲埋去諗住買番啲, 但佢嘅mask原來有四十幾種, 仲未計其地skin care products, 五顏六色, 睇到我兩個頭暈眼花, sales姐姐又唔多理我哋, 諗住問佢哋拎單張簡介及price list自己研究吓, 佢竟然話派晒。

算啦! 就當我哋無緣啦!

呢個brooth就係我老友honey架啦!  最好笑係我哋係會場識到另一位師奶, 傾傾吓佢叫我哋帶佢嚟我老友honey個brooth, 睇吓有乜好嘢, 就係咁, 我哋帶咗位大客返嚟, 呢位啊太竟然係咁咦就買咗成千蚊護膚用品。好豪呀!

原來佢每年都會同朋友嚟行呢個show, 每次會一嘢買晒一年要用嘅護膚品, 話用批發價買抵用好多, 比85蚊入場都值咁話, 果然夠厲害。今年佢幾個friend返晒HK, 所以佢一丁友嚟行。

行到攰攰地, 坐低食lunch, 我好叻呀, 唔使食fast food, 比我揾到個凱撒沙律食加支礦泉水, 宇宙到呀!  但貴到嚇C你, 咁就12蚊($8.50加$3.50), 我老友食嗰份麥包吞那魚三文治仲貴過我嗰沙律, 收$8.75, 最惨係唔係咁好食。

算啦! 好過食burger or pizza呢啲毒物, 預咗係呢啲地方食會好似比人打劫咁架啦!

行到2點半就打道回府, 好彩我位honey拍心口話佢搞掂, 會接晒四個細路放學, 咁我哋兩個啊媽就唔使趕住仆返去凑放學。但星期二係四個細嘅放學時間都唔同, 2點20分至3點30, 穿梭兩間學校, 左騰右騰, 真係辛苦晒啊honey。老友話你咁夠義氣, 叫我咀番你一嘢!  

雖然個show無揾到啲乜嘢新奇好玩嘅嘢, 但同老友行吓傾吓都好開心, 就當去update吓啲美容產品最新潮流囉!

Dinner 同老友一家去咗打邊爐, 因為係佢牛一吖! 

祝我呢位老友生日快樂, 青春不老。