L'Occitane 洗頭水

今次想跟各住姊妹分享我近兩年所用的至愛洗頭水, 未搵岩呢隻洗頭水之前, 試過好多不同牌子的洗頭水, 有salon professional 專用既, 有賣行廣告既, 有超市賣既, 但一直咁多年來都未曾搵到一支稱心滿意既。

直至比我遇上佢: L' Occitane Aromachologie Volumizing Shampoo。

有一次跟表哥一家去Boston玩, 而我表哥是在五星酒店做既, 員工福利可定期免費入住集團內的酒店, 所以個次一家四口跟左佢一家去Boston玩, 住在那裏的四季酒店, 而酒店入面所用既浴室產品就是L'Occitane呢個品牌, 第一次用已覺得好正, 第二日用多次已經愛上左佢, 用完之後D頭髮好柔軟好滑, 梳頭時又不打結, 連護髮素都可以唔用, 但佢品牌係有出護髮素既, 只係我懶用。但都幾貴, 10.1安士賣美金十七蚊, 雖然肉痛但仍然覺得係值既。

我見呢個洗頭水咁正, 有次拿到幾支2.5安士既旅行裝, 咪醒支比我好友啦!

點知上星期佢見到同我講: "比你支洗頭水累死啦!"

嚇死我, 以為搞乜鬼?

原來佢話佢囡囡拎左我比個支洗頭水黎用, 用完同佢講話好鐘意咁話。

我立即話: "你個女都好識貨喎!"

佢話支野咁貴, 佢屋企用洗頭水既消耗量咁大, 點可以用佢, 跟住鬧鬼我比支野佢。

最搞笑係佢最尾彈一句話: "我今朝用左次, 又真係好鬼正。"

即時反白眼, 比佢激死!

最後個故事係佢已經買左支黎用。

呢支就係我既至愛洗頭水啦!