溶黑頭精華液

上次答應大家等我試驗完一支我係香港買番嚟嘅溶黑頭精華液之後, 會出blog同大家分享。 經過一個月試用後可以同大家講講喇!

點解我會買呢支溶黑頭精華液嚟試, 好大原因係因為係youtube睇過袁小姐介紹, 本來我想試埋個支B3補水精華, 但斷貨冇緣買到。Anyway, 講番呢支溶黑頭精華液先, 佢個英文全名係Synergie Skin Exfoliating Serum, 澳洲品牌, 係美國呢邊買唔到。

佢嘅成分有水, 甘油, 乳酸, 水楊酸, 蘋果酸, 杜鵑酸, NaPCA, Rosewater, 蘆薈, 葡萄籽精華。其中主要嘅水楊酸, 蘋果酸, 杜鵑酸能夠去除多餘角質,保持毛孔疏通,溶化黑頭, 收細毛孔, 而杜鵑酸更可美白和祛暗瘡印添!

頭一個星期我係隔晚用, 只係搽係鼻頭, 鼻旁兩側面頰及下唇下面凹落去嗰個位。另外我左面豬位有三粒小小嘅粒粒, 都唔知係油脂粒定粉刺白頭, 呢三粒可惡嘅粒粒, 係今年七月尾時去上course, 聽一個有廿幾年經驗既外國美容師, 教我點用佢哋啲防晒產品搞出嚟嘅, 外國人嘅皮膚同我哋東方人嘅真係唔同, 佢哋係好乾, 要好潤, 佢教我嘅方法要搽三隻產品來防曬, 太油啦, 搽咗兩三日就出事喇!

我見係正塊面豬度, 點敢去亂按亂唧呀! 唯有靜觀其變, 點知等咗兩個月都原封不動, 我好驚呢幾粒嘢從此定居係我塊面。所以係香港返嚟之後, 試呢隻溶黑頭精華液時, 我搽埋呢三粒嘢, 搽完頭一個星期, 佢哋真係有縮細咗嘅反應, 所以之後三個星期, 我好乖, 每晚都搽, 希望將呢三粒嘢除之而後快。

好失望, 佢哋只係縮細咗少少又變硬咗少少, 但冇消失囉!

我巳經開始無耐性, 開始嚐試去唧走佢, 咁當然失敗啦! 試咗幾次都唔成功, 仲搞到紅晒, 咁點算喎?

最後要多謝教主千里寄嚟嘅寶貝~~~抗氧酵精! 

遲D再開另一個blog話過大家知我個三粒嘢變成點。

講咗一大堆嘢, 咁即係呢隻溶黑頭精華液掂唔掂, 有冇效, 好唔好用呢?

真心嗰句係幾好嘅, 只係我嗰三粒嘢太頑强啫!  但我搽嘅其他位置, 鼻頭及鼻嘅兩側面頰, 毛孔係明顯收細咗, 滑咗, 無乜黑頭粉刺再出現, 下唇凹落去嗰個位平時會摸到少少粒粒兼嚡嚡哋, 依家係滑滑嘅。仲有就係我試過有位置想出暗瘡, 即搽呢隻溶黑頭精華液, 第二日粒瘡消失咗冇爆出嚟! 但美白及祛暗瘡印嘅效果就唔多覺喇!

如果真係成日有黑頭粉刺及毛孔較大煩惱嘅姊妹, 不妨一試, ok work架。但平日都冇乜呢啲問題嘅姊妹就冇需浪費銀両, 勤力啲每星期做吓磨沙去角質, 定期做吓deep cleansing mask, keep住毛孔暢通仲好啲。

總之都係嗰句, 呢個世界係冇醜嘅女人, 只有懶嘅女人, 想靚係要付出時間及心機, 絕對冇不勞而獲嘅! 

實在見過太多想變靚但又懶得打理自己嘅女人, 仲要話啲護膚品冇效唔work。 大小姐呀! 你鍾意嘅就用吓, 唔鍾意嘅幾日都唔用, 懶起上嚟連面都唔洗, 點靚呀! 要一夜傳奇都要出少少心機架! 齋講唔做, 神仙都冇符啦!

揀護膚品同揀男人一樣, 一定要揾到啱為止, 唔啱嘅, 勉强無幸福, 只有分手囉!

我的感恩節

呢兩日忙於過節, 荒廢咗個blog兩日, 係時候update吓, 唔係比人追到瘦!

星期四係一年一度嘅Thanksgiving, 當然要食turkey應吓節啦!

你睇! 我哋隻15磅嘅火雞幾咁有睇頭, 雖然唔係自家製嘅, 但都唔錯, 啲肉唔嚡仲幾juicy添!  而隔離呢個咁可愛嘅疍榚, 係ice-cream cake嚟架!

其實當日仲有臘味糯米飯, 雜果沙律, 焗蕃薯, 芋頭西米露, 朱古力慕絲疍榚。

係咁開心嘅日子, 我就梗係放縱吓, 冇宇宙兼食完再補飛啦! 雖然走咗出宇宙村, 但只係亂食並冇喪食。

而一向做慣水魚魚腩嘅我, 大戰16圈後, 竟然有錢袋, 奇蹟奇蹟。

係美國, Thanksgiving後一日嘅Friday叫Black Friday, 係傳统減價掃平貨嘅shopping day, 美國人係呢日開始就shopping for Christmas架啦! 而所有商店就會用大減價作招倈, 仲要限時限量, 半夜開門, 引消費者未到半夜就開始排隊。

雖然血拼係我至愛嘅運動, 但半夜捱冷咁去排隊等開門買嘢, 我嚟咗咁多年到未試過。而好多商店嘅折扣優惠中午前就冇架啦! 所以我哋嘅血拼大隊中午前已到達New Jersery嘅Woodbridge Mall。

嘩! 個Parking Lot使唔使咁爆吖! 泊到出咁遠嘅邊邊位置都滿晒, parking lot都咁爆, 咁個mall入邊咪~~~~~~~~~~~~~

勁多人。

你睇我兩位寶貝第一個沖埋去嘅商店係呢間朱古力專門店, 12點前有5蚊特價朱古力, 售完即止。

好彩行快一步, 金色盒呢個6粒庒嘅Holiday Truffle朱古力, 特價5蚊美金, 仲要係最後一盒, 想買多盒都無啦! 後尾先知呢盒嘢平日係賣15蚊呀! 而隔離包係價值10蚊至得5塊, 包咗層朱古力嘅Oreo餅, 兩蚊塊oreo cookies, 好貴呀!  唔係化?

Anyway, 右邊粒就係比我吃咗落肚嘅Truffle朱古力, 真係幾好味bor! 嘻~~~

啍! 又話乜嘢Black Friday大減價, 乜嘢after Thanksgiving big sale, 呃人架! 又迫又多人, 但睇來睇去都冇乜特別, 我要嘅係勁減, 狂減, 癲減呀!  睇真啲咪又係同平日on sale差唔多。啲老外使唔使買到左一袋右一袋咁呀!

睇吓條排隊比錢嘅人龍, 由customer service個樹開始, 打晒蛇餅咁! 我一見排長龍嘅鋪頭就即閃, 費時睇中啲嘢想買時, 都唔知排唔排隊好, 一排分分鐘要半粒鐘, 咪搞!

血拼唔盡興, 唯有同兩個寶貝影多兩張相啦!  家陣已經好有X'mas feel。

我哋血拼大隊嘅lunch, 好毒啊!

呢間嘅fries, 最近改咗用乜嘢海鹽做話題, 我只係試咗兩條, 勁咸呀! 為免浪費我寶貴嘅quota, 我當機立斷, 揀唔吃即閃, 閃咗去呢間........

寧願lunch當high tea, 飲咗坏Latte with soy milk再嚟件Low fat blueberry crumbcake。

其實好想試呢幾杯放係門口做promo嘅飲品, 但我最後都冇失控, 嗰啲wipe cream勁肥呀!

其實都有些少商店有mark down 嘅, 好做H & M, 都有啲5蚊10蚊嘅貨品。我都係樹買咗件由25蚊減到5蚊嘅恤衫及一件半價嘅衫。

但當我見到啲嘢比人摷到亂晒兼一地到係, 即時冇mood再睇。

走之前同小公主影番張相先。

雖然掃得唔high, 但原來我都買咗2件tees, 1件sweatshirt, 1件top, 1件恤衫, 1件薄外衣, 1條jeans再加1頂冷帽。

走咗出宇宙村兩日, 係未蕩失路之前, 快啲入番村先! 今日好乖, 全日宇宙餐補飛。

努力。變身。厨神

我嘅厨藝又幾高, 相信各位小天使都略知一二。

 我呢個唔多合格嘅主婦, 自從加入宇宙村, 拜教主為師後, 巳經升呢咗些少, 最少唔

 再係.......

無飯主婦加地獄厨神嘅混合體。

教主下令重煮嘅咖喱雜菜仲未交差, 只因屋企幾位老細都有啲燥熱, 唔敢煮咖喱住, 但其實我已經買好晒料, 大家等睇我交功課。況且茶茶仲示範多一次比我睇, 再失敗嘅就真要打啦!

 昨晚係小公主嘅正日生日, 本來諗住煮飯架!  但小公主要發牌揸主食乜做晚餐, 可能佢都係信唔過佢啊媽, 佢最後揀咗一日一鍋, 齊齊十吓十吓, 一人一個肥牛套餐。

 食火鍋就最易宇宙, 菜瓜菇加肥牛, 宇宙冇難度, 仲好正添!

 但唔好食啲乜丸物丸, 防腐劑味精加埋啲粉嚟整, 少食為妙!

 ~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

 今晚凍番好多, 所以乖乖地留係屋企煮飯仔。

 簡簡單單又一餐。

但我真係要多謝呢兩件, 我係香港帶返嚟嘅法寶,

 Ankang出品嘅有機黑豆豉油及惹味粉。

 大家都見識過我嗰碗升級版豉油撈飯, 呢支黑豆豉油真係好有豆香味, 好鮮甜。

 而惹味粉真係好用過啲雞粉, 用嚟做湯底又得, 調味醃肉都得, 最掂係佢無人造色素, 人工香料及防腐劑, 素食人仕都啱用。

 我屋企三位老細好滿意, 食得好知味, 最緊要夠健康。

 我會努力變身, 變身, 再變身做宇宙村內嘅

天使厨神。

紅葉片片黄葉飄

一年四季, 春夏秋冬各有特色, 你最喜愛那個季節呢?

我就最鍾意秋天, 除了氣候乾燥一點, 氣温舒適, 不冷不熱, 唔使好似夏天咁大汗叠細汗, 又唔使好似冬天咁包到自己變裹蒸粽, 春天潮濕又多雨, 勁煩, 唔鐘意。

有紅葉!

又有黃葉!

如果屋企嘅前後花園, 有紅又有黄, 再係樹下high tea 嘆茶, 幾咁悠哉悠哉。

所以秋天是我最愛嘅季節。望見四處樹葉由綠變到又紅又黄, 好詩情畫意吖!

但係詩情畫意嘅背後, 都有令人煩惱嘅一面呀!

只係賞葉當然無煩惱, 如果要你掃, 點睇先?

係美國住既blog友仔就會明我講乜啦!  一到秋天, 黃葉片地時, 若然你住house, 就要負責掃乾淨自己門前又紅又黃嘅枯葉啦!

你睇你睇, 一場雨啫, 門前就會變成咁。詩意不再。

大風啲吹吓, 連隔離屋, 甚至乎對面街嘅黃葉都湧晒埋嚟你門口, 視乎當日風向囉!

愉懶唔理, 唔使兩日變成咁, 又乾又碎, C未。

可能你會話, 唔掃, 吹吹吓去咗第二度咁咪唔使掃囉! 

好彩嘅話都得嘅, 但假如比衛生局抄飛人員行過你屋企, 咁你就要破財啦! 一個唔覺意, 張罰單過百美金都得架!

最慘係啲樹唔會一夜光頭, 一個秋季要等啲葉甩晒, 都要好幾個星期, 而掃葉呢份習作就有排做喇!

可能自己門口棵樹已經七零八落, 但响隔離屋個棵仲未捨得飄落嚟喎!

就係咁, 掃呀掃, 有排都未完成呢個掃葉壯舉。

有乜人係唔使掃?  租客囉! 只要你係house 嘅屋主就冇走雞。仲有計嘅, 就係apartment 嘅屋主可以唔使理唔使煩, 皆因管理費已經比咗錢請人搞掂。

~~~~~~~~~~~~~~~~~~~~~~~~~~~~~~~~~~~~~~~~~~~~~~~

由此可見, 凡事皆有兩面睇, 要將同一件事情看成黑還是白, 就要看你的心了。

望見半杯水, 有人嘆氣說只剩下半杯, 有人開心說好彩還有半杯。

心情影嚮感覺, 凡事看得正面, 正能量高漲, 自然萬事皆美。

反之, 常被心魔負能量控制, 常鑽牛角尖, 自然什麼也沒趣。

心境如何, 隨心所轉, 快樂與否, 由你選擇。