足浴

呢兩日天郎氣清, 係就係凍啲, 只要唔使我担住把遮, 又濕又凍, 我就心情靚靚。

天氣好咗但我對腳又唔爭氣, 呢兩晚對小腿勁水腫, 變咗節瓜咁, 今朝磅一磅仲嚇親自己。 做乜無那那標升兩磅???

 應該係M前水腫啩!  呢兩日仲勁想食甜嘢同澱粉質。真係弊!

小腿變節瓜, 睇見心情差。

唔理咁多, 出招先! 

呢招就係教主傳授嘅秘决~~~ 浸浴/足浴。

今晚冇時間浸浴, 嚟番個簡單足浴都好, 用熱水浸吓對腳, 一邊睇書一邊浸, 好relax, 正呀!  你鍾意嘅睇住電視聽住音樂嚟浸都得喎!  雖然只係浸咗15分鐘, 但越浸越熱,  後尾仲標晒汗。嘩! 仲唔係排毒汗去水腫, 掂呀!

其實足浴最好係用個水桶浸, 啲水浸到上小腿就最好, 我浸腳個盆係唔多合格嘅, 大家唔好學, 但呢件嘢係舊年未識教主時, 見減價貪玩買番嚟嘅, 玩唔到幾次就比我冰封咗, 家陣粗粗哋用嚟頂住先啦!  扔咗佢又走去買水桶, 我怕honey又話我敗家。

教主教落想消除水腫加強代謝, 就要用浸浴及足浴嚟改善。水腫跟血液循環不良及體內毒素有關。浸浴及足浴同時可改善冬天手腳冰冷問題, 啱晒我架, 不過我有時偷懶, 教主叫一個星期浸兩三次, 我就一個月至浸到兩三次。

如果你對香薰有認識, 加些少香薰精華落啲水先浸仲正呀!  上次返HK, 顧問安排咗一次香薰浸浴過我嘆, 又香又relax, 無得頂, 仲有啲玫瑰花辧係度飄飄吓, 直情覺得自己變咗貴妃出浴咁。 

唔識搞香薰唔緊要, 教主話加啲粗鹽或米酒, 一樣幫到手。但記住浸浴足浴後飲番多啲水, 補充番失去嘅水分。