生日會@Bounce U

昨天心情勁靚, 望見太陽伯伯向我微笑, 只要太陽伯伯啲紫外光唔好追住我, 基本上我都愛天天天晴嘅!  再加埋呢日係我另一個心肝寶貝姨甥仔生日, 搞生日party, 有得玩又有cake食, 仲唔開心到痺!

咦! 搞邊科我仲興奮過我兩位寶貝嘅呢!

昨日國語班考midterm, 唔知小公主同小王子考成點, anyway, 放學後食少少嘢就揸車去party場地。

今次細妹幫佢仔仔係Bounce U 搞生日會。

嘩! 厲害呀! 只係計小朋友都有十九位, 計埋啲爸爸媽媽, 場面熱鬧, 小朋友玩得好happy。一齊睇睇party場地有乜玩先。

係Bounce U 開party, 分三個房進行。首先會入第一個房, 入面有三個吹氣遊戲。

呢個game要係右邊個net度, 踏住啲繩逐層爬上頂, 再「sir」滑梯。

就由小公主示範比大家睇。

左邊係小公主幾經辛苦爬咗上頂預備「sir」啦!  唔使3秒, 大字形到步。

個衰妹話好快好刺激, 正呀!  仲話要玩多兩轉。

呢個game有D悶, 齋係入面跑來跑去, 左跳右跳, 所以唔係咁愛歡迎。

呢個入面有好多波波, 可以玩投籃, 原先我揸住部相機入去, 諗住幫佢哋拍番啲靚相, 點知班0靚當我係人肉沙包, 一入去就食波餅, 個個圍攻我, 為免壯烈犧牲, 我仲唔連人帶機拿拿林碌番出嚟咩!

呢張就係比人圍攻時, 辛苦嘅相片。

之後再到第二個房, 入面再有三個吹氣遊戲玩。

呢個房都有「sir」滑梯, 不過仲大仲快仲激。左邊係樓梯爬上去, 右邊要穿對腳入袋至「sir」落嚟! 上面三位係我對寶貝加壽星仔。

唔使兩秒又到步, 你睇中間啊小公主今次唔係大字形, 直情反晒艇咁。

呢一個game係打boxing, 對手套勁重, 大人都舞唔郁, 究完係咪用嚟玩小朋友多過比小朋友玩呢!???

第三個係比小朋友競技鬥快, 但我竟然漏咗冇影。

一共玩咗個半鐘, 轉到第三個房就係eating time。Party係包埋疍榚, 食物及飲品嘅, 小朋友例牌Pizza加果汁, 大人就有pizza, 水果盆及Chicken Pamasa。

你哋睇小王子玩到塊面紅卜卜, 頭又濕晒, 狂隊apple juice。

個疍糕係ice-cream cake嚟架。

呢個就係主角, 我另一個寶貝, my lovely姨甥仔。

你睇佢幾肉緊咁吹candles。

玩咗兩粒鐘, 個個小朋友有禮物包一份笑住走。呢三位就轉場去咗我細妹屋企繼續癲。

最後返到屋企都已經10:30pm, 勁眼瞓, 對寶貝冲完涼, 上床唔使三分鐘, 巳經大昏迷, 呼呼入睡。