當咖喱雜菜小姐遇上糙米飯哥哥

早兩日見綠茶煮咗個椰香咖喱雜菜, 睇到個我流晒口水, 食指大動。

真係佢煮乜, 我就想食乜, 咁搞法真係唔掂! 茶茶, 你再隔咗個monitor嚟引我, 我驚我有日會失控喪食呀!

 唔嗜辣嘅我, 辣味中我只愛咖喱, 甚麼咖喱雞, 咖喱牛腩, 咖喱雜菜, 通通唔放過, 咖喱汁撈飯都可以食餐飽。

但自從修練宇宙神功後, 為咗可以撈飯, 多數揀咖喱雜菜配飯。有時趁M嚟會偷偷地犯規一次, 嚟嗰咖喱雞飯嘅。

雖然我咁鍾意吃咖喱, 但我唔識煮囉! 真係冇鬼用。

今朝去超市入貨時, 突然諗起好耐之前細細妹過嚟時, 帶咗一包已ready to cook嘅泰國咖喱醬包比我, 佢話好易煮, 冇難度, 但我擺埋一邊冇咗件事。今日咖喱癮起, 既然買緊餸, 决定要煮咖喱雜菜, 買咗椰菜, 椰菜花, 紫洋葱, 皇子菇及紅蘿蔔。點知嚟做大厨時, 發覺唔記得帶薯仔哥哥返屋企, 真失敗。

有主角都要有配角架!  點可以漏咗一碗0靚仔呢!  今次我飛起白飯0靚仔, 要同糙米飯哥哥傾吓心事。

呢堆就係我嘅材料。嘩! 真係貪心, 隻鑊夠唔夠大呢?

呢包就係我嘅懶人醬料包, 我發現佢係冇防腐劑嘅, very good!

搞一大輪, 洗洗切切, 天使厨房可以開爐啦! 

最後我只係用咗半隻椰菜, 因為實在太多料啦。

起鑊爆好晒D雜菜, 差D隻鑊都唔夠大呀!

之後就倒包咖喱醬料落去, 又幾香喎! 

都係自己多手加咗小小水落去, 搞到水汪汪咁, 幾驚埋唔到尾呀!  好彩冇乜事, 仲食得吓, 但個咖喱汁再杰小小會好啲囉!

唉! 要成為宇宙界嘅天使厨神, 真係仍需努力努力再努力。

配角都搞點埋, 可以開飯啦!  呢個就係我嘅dinner, 其餘嗰啲三位老細掃清光, 多謝各位棒場。

我越嚟越鍾意啊糙米飯哥哥, 佢好快會成為我嘅至愛。

我諗如果揀菜配肉, 呢個咖喱可以加啲蝦或者雞落去煮, 應該都會好好味。 但食咖喱, 我又唔捨得碗飯囉!