升級版豉油撈飯

今日係美國嘅holiday Veterans Day, 學校唔使返學, 兩隻嘩鬼晨咁早就彈起身, 返學又唔見佢咁醒神。比我瞓晏小小都得啩!

飲完酵精再吃埋我個大蘋果做早餐, 之後吸塵抹地做啊四, 攪掂晒但要回吓氣。見時間尚早, 又未到lunch time, 上blog四圍巡吓先, catwalk去茶茶嗰邊, C囉, 比佢碗飯吸引住, 睇到我流晒口水。

大家都知我未修練宇宙神功前, 係好鍾意食澱粉質食物, 粥粉麵飯, 餅干疍榚麵包, 全部係我至愛。但自從入咗宇宙村做咗教主個弟子後, 家陣每日只係有一餐食澱粉質, 有時幾日都未必有粒米到肚, 只因有時揀咗食麵, 米粉或者三文治。真係戒甩鋪飯癮好耐。點知~~~就係茶茶post咗呢兩碗糙米飯, 搞到我飯癮起。

使唔使0靚仔成咁呀!

再睇埋佢個茶茶秘製方法, 真係人都癲呀!

http://hk.myblog.yahoo.com/win-windie/article?mid=35129

原本諗住lunch食生菜疍三文治, 即刻臨時轉軚, 走去浸米, 個時已經係中午12:30, 浸半個鐘, 一點三至襟制煲飯, 我個電飯煲係有煲糙米功能, 心諗煲一個鐘應該有飯開喇啩! 點知竟然要煲成一個半鐘, 差啲餓鬼C我。

主角終於搞掂, 配角出場, 家陣要用教主教嘅方法同佢整色整水。

就係要加番啲Olive Oil 同豉油, 攪佢幾嘢, 開飯啦! YEAH!

為咗呢煲飯, 等到我頸到長。我巳經饑寒交迫, 呢兩隻巳經食咗三文治做lunch 嘅衰嘢, 見我開飯, 仲開心過我。

好明顯佢哋又嚟同我爭食啦! 

好彩我煲咗一杯米啫。大家睇吓佢兩個嘅為食樣。

我仲加料, 煎咗隻有機荷包疍係上面, 篤穿隻疍, 流啲疍黄出嚟, 撈均晒佢, 試番啖。

嘩! 好味都無朋友, 停唔到口, 我消滅咗一大碗, 好耐冇食過咁大碗飯。

我仲想添架! 但係呀沙律小姐望實我, 叫我唔好唔記得佢嘅存在。呢一餐做唔到三七, 得五五添, 實在太飽, 晏啲至補番隻Kiwi 啦!

呢碗加料升級版豉油撈飯仲令我諗起點點童年回憶, 小時候冬天, 媽咪間中會蒸臘味, 蒸好臘腸臘鴨時, 碟中一定有油, 仲好香架, 媽咪會用少少嗰啲油,加豉油再加隻荷包疍撈飯比我食, 嗰時細細個, 覺得係人間美食, 食完暖笠笠。依家就梗係知唔應該食臘味, 更加唔應該撈嗰啲油嚟食, 唔健康嘛。

所以人生好簡單, 其實只要易滿足, 冇需山珍海味, 簡單如一碗豉油撈飯都可以令人樂上半天。

本來我對糙米飯嘅口感麻麻哋, 但估唔到換過個煮法, 再變一變個食法, 可以好味到咁。多謝教主及茶茶, 你兩個再次改變了我。呢碗飯令我感覺超幸福。

I love both of you so much。咀番啖先。