廢寢忘餐

有乜嘢會令人廢寢忘餐嘅呢?  咁就梗係啲新玩意, 仲要方便快捷, 好使好用兼多功能啦! 自從Apple出咗部「艾瘋」後, 真係令全球人類玩到不亦樂乎, 家陣部「艾瘋死豬」仲出到第四代添! 

我所識嘅人當中, 好多已經中咗艾瘋毒, 最新近名單, 有我屋企三位老細。

唉! 自從上星期五我honey公司出咗部「艾瘋」比佢之後, 佢就中毒啦! 啲毒仲好快傳埋比一對寶貝。三隻嘢一有時間就拎住部瘋豬, 左按右按, 左影右影, 差啲連去廁所都要拎埋入去上FB。我終於明白乜嘢叫做廢寢忘餐啦!

我呢個大內總管見到咁嘅情況, 當然要出招啦!  如果唔係對寶貝連功課都唔使做呀!  唔攪掂你哋啲分內事, 比我見到隻艾瘋豬係你哋手上, 我一定拉人封豬兼充公。

Honey, 你到時咪話我心狠手辣呀!

你哋梗係會問點解我冇中到毒。哈~~~因為我百毒不侵囉!

隻「艾瘋死豬」入咗門成個星期, 我只係試過佢嘅影相功能, check過一次email, 上過一次FB update status, 打咗三隻字「晚飯中」, 係咁多啦!  我都好欣賞佢嘅內置中文輸入, 因為我係NY買嘅電話多數係外國版, 寫唔到中文嘅! 而我都覺佢影嘅相, 出嚟嘅效果都幾好, 某程度上可以唔使帶部DC出街。

我之所以無比佢嘅迷人功能吸引住, 因為我衰囉!  懶有性格, 玩獨持, 唔肯跟風囉!

嗱~~~

各位手持「艾瘋」嘅姊妹唔好咆哮住, 咪掟我爛菜雞疍, 講句sorry先! 

我認我衰格架!  其實唔止電話, 我連褸, 手袋及鞋都係同樣態度, 當人人闖入同一個方向時, 我梗係玩反方向跑番出嚟!  我唔想好似著制服咁!  我反而鍾意去嚐試及發掘一些新東西, 希望考吓自己眼光, 好有滿足感架。

我認承隻艾瘋豬有佢一定程度嘅吸引力, 我唔敢擔保自己唔會有一日中埋艾瘋毒(屋企三隻嘢對我狂sell, 猛落重藥), 但暫時未囉! 

最新消息, 連我啊妹噚晚都收養咗隻艾瘋豬啦!

其實我已經身痕, 想換電話啦!