剛剛學識放相上blog

剛剛學識點樣upoad D相上blog度, 等我俾D"肥"玉照大家睇下先, 請大家有心理準備, 千祈唔好比我嚇親, 搞到反胃吃唔落飯ｏ

好, 去片

以下呢三張係去年summer返HK時拍既

唉, 我塊面, 圓碌碌想點, 水桶身形, 撞鬼呢, 無有識死, 仲要走去學人著白色, 仲肥ｏ

係咪覺得第三張塊面突然變尖佐呢, 皆因個trip最後兩星期時, 唔覺意咁join了$988個plan, 呢張就係在療程最後一日, 上完Angel Face之後映既, 當時10日瘦佐3磅左右, down to 121磅。個酥皮湯我冇飲到, 個仔飲佐, 映相時用來扮下野ｏ

呢張係去年11月尾, 個女生日時映既, 塊面開始打回原形ｏ

大家睇到日期啦, 今年1月3日映既, 飽飽面回歸, 仲肥過返HK個時, 磅數直迫125磅ｏ 天呀! 我做乜搞成咁!

 

又開始用節食減肥, 減得好辛苦, 用了個半月先減佐1磅咁大把, 好失望呢!

最後, 痛定思過後, 2月中決定開始跟Angel既宇宙自然飲食法, 加埋飲了21日排毒酵精, 仲有每兩三日煲Angel 教既瘦身湯飲, 個半月減佐５磅ｏ

雖然進度唔及其Angel's angel 減得咁快, 一個月可以減10磅, 但唔使捱餓又減到磅, 仲要係健康咁瘦, 巳經好開心ｏ

今朝上磅118.4磅, 好, 繼續向110磅目標進發ｏ

 

 

3月31日

出佐去玩幾日, 係時候又要報告下我的減肥戰況啦!

係三日兩夜的旅行入面, 連續食佐兩日自助餐, 無法, 屋企兩隻小鬼勁鍾意吃自助餐, 我呢個阿媽唯有啥命陪君子, 死就死啦, 母愛真偉大ｏ

宇宙神功果然厲害, 今朝踏上電子磅一望, 數字係

118.4磅

自己都嘩一聲, 冇肥到仲輕佐差不多1磅喎ｏ

不過, 我都好乖, 跟住Angel教食自助餐既方法, 一開始就一大碟雜菜沙律先, 之後先慢慢食D肉, 再來半碟蒸雜菜(有瓜又有四季豆), 最後都食了少少雪糕(嘻...,好耐無食, 忍唔住口)

今次食沙律只係用佐好少沙律醬, 一來怕肥, 二來發現食雜菜沙律加一些提子乾一齊吃, 好好味, 沙律醬都唔使點落, 正呀!  各住姊妹可以一試ｏ

一家人去玩

好開心, 剛剛一家四口去了三日兩夜的短程旅行, 雖然所去的地方是我們慣常去玩的, 只因是一家人一齊, 去邊都咁好玩ｏ 我的一對活寶貝, 有得游水兼食自助餐已好滿足開心, 仲有shopping就一定是必備節目ｏ

我的戰利品有一件White & Black 既cotton top, 一件Banana Republic 既薄外衣, 一件Ann Taylor LOFT有型薄jacket, 仲有3對鞋, 係, 你冇眼花, 真係3對, 一對Clark, 2對natualizer, 全部加埋, 盛惠美金$140有找, 超抵, 3對鞋平均十五蚊一對, 抵到爛ｏ我個妹已經迫我送一對比佢, 傻傻地既, 鞋都未睇就已經搶啦! 算啦, 見佢就來生日, 勉強割愛一對比佢啦!

老公都買了對Clark, 但都要四十蚊, 佢不知幾妒忌我可以用十五蚊買到筍貨ｏ話時話, shopping掃筍貨, 真係我的強項, 你知喇, 賺錢唔容易, 梗要用最少資源買到最好既野ｏ好多親朋好友都搵我幫手買野, 尤其當我返香港時, 我覺自己似去辨貨多過去旅行ｏ

其實仲有件Coach既絨褸, US$488減到$105, 80%off, 但我有太多褸啦, 唔可以失控ｏ

我那個傻傻地既妹, 兩星期後同好友返香港, 平時我都幫佢買得多啦, 今次仲唔到我比張買貨單佢。

3月26日

繼早兩日打破減肥120的困局後, 呢幾日繼續努力, 今朝上磅數字係

119.20磅

多謝各位叫我努力的blog友支持, 叫我加油ｏ

雖然與其他人比較, 我的減肥進展慢過他人,

但只要堅持, 今次一定成功, 仲有9磅!

真係白佐喎!

真係白佐喎!

我講緊我塊面D膚色, 近排試緊一隻美白精華, 係個friend話掂叫我試的, 咪係同我一齊買到假貨面膜那個囉, 用了一排, 係好似白D, 但都有諗, 係咪自己心理作用呢!

直到上星期日去飲, 拿出用開的資生堂濕粉及碎粉出來, 唸住化番個靚粧見人先, 點知化完之後, 咦, 咪住, 有D問題, 點解化完塊面望上去仲黑過未上粉個陣, 冇理由架, 隻色用開十幾年, 一路都冇問題架, 唔信自己對眼, 走出廳度問老公同個女, 佢地都話係深色佐ｏ平時較少用濕粉, 覺得太heavy, 所以只係去party or special dinner先會用ｏ點算?

唉! 係越望越覺自已樣衰的情況下, 最後…. 唯有落粧, 洗乾淨塊面, 由頭再化過, 用番最新近買個隻礦物粉底, 當堂順眼番晒, 好彩個日唔趕時間ｏ

証明隻美白精華真係work喎, 好, 我就乖D, 用足成個療程, 做個美白仙子, 一來老公都鐘意我白D, 二來又有藉口,可以叫佢比銀兩我買過D化粧品ｏ哈…有賺呀, 又去shopping, I love itｏ

美白与減肥都是女性一生一世的課題, 永冇完結, 只有追尋更好及用盡方法去keep住ｏ姊妹們, 努力加油!

P.S. 剛剛學識點post D相上blog, 補番兩張before & after既相比大家睇睇先ｏ

Before, 2009年10月中

睇到日期啦, 3月13日ｏ

終於打破困局啦!

好開心, 終於打破困局啦!

今朝踏上電子磅, 見到119.8, 仲以為睇錯, 望真D, 係穿了120磅喎ｃ

唔得, 仲有D唔信, 十分鐘後再上磅, 真係119.8磅ｏ

YEAH! 繼續努力加油, 向目標110磅進發ｏ

唔好比Ｄ衣服品牌呃!

點解我會咁講, 因為我係紐約買開一個品牌, 由做女個陣著4號到生完BB著8-10號(係呀, 生完肥都唔想照鏡, 陰公), 十年來瘦Ｄ又肥番, 最近幾年開始著番6號, 去年九月竟然可以著番4號, 但心諗磅數無變, 又唔覺自己瘦了,  正當N個問號出現時, 發現一條以前唔知幾時買落的6號褲, 喂, 搞乜呀! 剛剛扣到鈕, 咁我新買個條4號點先, 拿拿聲度下兩條褲, 咦, 點解褲頭一樣呢!  我有諗過會唔會車錯size牌, 下次shopping再睇真D, 無錯, 依家的4號大到係以前6號的sizeｏ

外國的品牌, size越變越大, 我地呢D為減肥而奮鬥的人, 好易誤會自己瘦佐ｏ

所以唔好見自己著細少少就以為瘦了, 免得白開心一場, 仲自己呃自己瘦佐ｏ

唔上又唔落???

又努力了幾天, 仍被120磅呢個魔咒因住, 人家減佐10磅20磅就話平台期啦, 我減得3磅半咁大把, 無理由平台期架, 搞乜鬼呢？呢幾日都係徘徊係120.2-120.6磅, 真係有點失落, 今晚仲要去飲結婚宴ｏ天呀! 要小心Ｄ, 如果唔係, 我怕我明天上磅會暈低ｏ

我巳經戒佐晚餐食澱粉質, 只吃菜和肉, 午餐就菜跟澱粉, 而家晚晚開飯, 我個寶貝仔就話: 「阿媽, 你又唔食飯啦!」真係比佢激死ｏ

我老公和我一齊開始減肥, 佢無跟宇宙自然飲食法, 只係多菜少肉, 但有跟我一樣飲了21日排毒酵精, 每天踏stepper 30分鐘, 佢竟然減佐8磅ｏ

我的天呀！我錯佐係邊喥呢?

塗完似gel甲的指甲油

話說有日在報紙上看到介紹一隻指甲油, 標明不含有毒物質, 大肚婆都可以用咁話, 其中有兩隻甲油, 一隻可做base, 另一隻可做Top coat的, 只係塗這兩隻甲油, 出來的效果也會好似做了gel 甲咁!

平時自己間中也會去做gel 甲, 但其實真係幾傷甲, 之後指甲變薄和軟, 所以見報紙登出來張相又真係幾似gel了甲, 所以拿拿聲上網搵啦, 又比我搵到喎, 勁開心, 前兩日收到, 立即試用.

嘩, 真係有gel 甲那種光亮效果, 加些少閃粉, 效果應該仲似, 又可以中間塗一層有色 or 做French nail 款.  "正"呀!