焗芝士肉醬意粉

昨天我對為食孖寶下單，要求我來個大大碟超多芝士嘅肉醬意粉比佢哋做晚餐。好啦！見咁耐冇食過，益下你哋啦！

點呀各位？呢碟自家製嗰look都呃得下人，至於味道應該還可以吧！至少被一掃而光，無賣剩庶囉！哈~~~

其實這個焗芝士肉醬意粉無乜難度。以我這些廚藝有限公司都整得似模似樣，就係一大証明。大家都可以一試。

材料：意大粉8-10安士、瘦牛肉碎1磅、意大利粉醬1瓶（24安士）、蒜茸2湯匙、小洋蔥1隻（切絲）、芝士適量。

做法：

1）先把意大利粉煮熟（粉的軟硬情度看個人喜好），煮意粉時，水中可下一些特級初榨橄欖油和少少鹽。意粉煮好隔水就可以放在焗盤上。

2）燒熱鑊下一茶匙油，放入洋蔥絲爆炒一下至洋蔥開始軟身，盛起。

3）燒熱一茶匙油，放入蒜粒再下牛肉碎炒至熟，洋蔥回鑊炒勻就可以落意大利醬，轉中火煮滾。

4）之後就可將這肉醬汁淋上意粉上。

5）灑上自己喜愛的芝士量。

6）預熱焗爐華氏385度，ok就可以把意粉放入，焗15-20分鐘，至芝士溶了還有一點點焦。

其實如果你鍾意食長通粉，可以用長通粉代替意粉。想高纖一點都可以落一些粟米粒、紅蘿蔔粒和青豆粒架。

最愛的咖哩雞飯

呢碟就係我最愛的咖哩雞飯，今日午餐見天氣冷，又肚餓，食咖哩暖身又好味。不過一食咖哩我就跟唔到宇宙飲食，因為我覺得咖哩與飯是絕配，缺一不可。

咖哩個汁都幾肥架！但咖哩本身又有消脂和去濕嘅作用喎！所以久不久我就會食番一次來滿足一下自己。

我本身是不愛吃辣的，就只有這家店的咖哩雞飯會引誘到我，至於點解呢碟咖哩咁深得我心，原因係佢有咖哩香味但又不會死辣嗰隻, 係辣得好惹味，令人回味無窮。

這家「新馬來西亞餐廳」在紐約曼哈頓唐人街歷史悠久，最少開業20多年，最近才重新裝修及擴大了！仲有一碟蜜汁牛柳飯都好正架！當年未有珍珠奶茶這類台式飲品時，佢哋杯七彩冰係夏天賣到排長龍。

至於價錢在紐約唐人街算是中等吧！這個咖哩雞飯加稅後，盛惠7.08美元。

未試過又想試下嘅紐約朋友仔，可以去曼哈頓唐人街Bowery Street 46-48號中國街內28號店一試。

簡易豉油雞

前兩晚心情靚，有mood煮又買到隻靚雞！就來個簡易版豉油雞嘆下！

以前煮豉油雞只係識用李XX記豉油雞汁，因為係啊媽教落嘅方法。自從開始注重健康飲食後，就想辨法盡量少用這些醬汁，因為始終有防腐劑、色素嘛！

終於搵到高人教路，原來個豉油雞汁好鬼易整，絶對無難度。做法也不複雜。

燒熱鑊，下一舊拍咗嘅薑、三條蔥（切段），之後放雞下去爆香一面，再翻雞身爆香另一面。如下圖：

接住贊廚酒一湯匙，再倒下已混好的豉油雞汁（老抽5湯匙、生抽2湯匙、美極鮮醬油1茶匙、冰糖3小塊，水兩碗半），滾起後轉中小火，慢慢煮。

太大火，汁快乾，雞肉易變老。想上色靚就要用不停用汁淋雞上面。我是先把雞胸向下煮10分鐘，翻轉煮雞背10分鐘，再翻轉煮雞胸10分鐘，其間可蓋上鑊蓋。至於嗰汁味道可煮滾後拿小小試味再調較至自己喜好。

30分鐘煮一隻4磅重嘅雞就差不多時間，大家自己執生，隨機應變啦！因為雞大小和火力大小都有差異，煮多幾次就捉到路。

上碟放涼一下就可以斬件啦！

　

廚藝大躍進

近排廚神上身不斷密密煮，越煮越好玩，我個廚房終於變成美味廚房不再地獄啦！哈~~~

點解突然間會廚藝大躍進？我都唔知點解搬咗屋之後，好似食咗聰明藥咁，醒咗好多。可能就係所謂「一理通百理明」啩！（但點解以前唔明哩！）

在親友間我出晒名係「無飯主婦」，做咗人妻做埋啊媽十幾年都煮唔掂，成日要出街開餐。真失禮！我真係衰到寧願洗碗省煲洗爐頭都唔鍾意煮。

唯一最叻係煲老火湯。直至三年前先開始的起心肝學自煮。最近游走於各cook blog, 發現有些食譜好簡易，咁我又試煮下，ok喎！可能我嘅廚藝天份而家先爆發出來。連我屋企三位老細都O晒咀。

我對為食孖寶最開心，成日等啊媽比驚喜。有時仲玩嘢到好似係餐廳點菜咁，話要食乜。咪玩啦！等我真係變咗廚神先再點啦！

今晚好開心，多謝blog友Agnes教我整蝦醬蒸肉片！自從媽咪唔係度，自己又唔識整，十幾年冇食過啦！感動中！

其實我哋永遠覺得媽媽餸菜係最好味，就算簡單如煎荷包蛋，也可以是人間美食，因為當中包含了愛。掌握家中各人個胃嘅就係媽媽。晚餐在家庭中係非常重要，因為大家各有各幫了一整天，就只有食飯時圍埋一齊嗰少少時間溝通一下。所以做我會繼續炮制美食，令我個家充滿愛。

香薰治療課程（Day 4)

我上呢個40小時嘅香薰治療師証書課程（Level 1)咁快就嚟到尾聲，好唔捨得！嗚~~~

接住落嚟只要交齊5個case studies, 再take埋個exam又冇肥佬，咁就拎到証書啦！

不過呢個course係值得讀嘅，獲益良多，對香薰精油有深入了解，又掌握到做不同產品的方法，直係40個鐘所學嘅多過自己過去一年自我摸索，買書增值。而家最重要係實踐和不斷experiment 囉！

真係服咗我位老師，要拎住又爐又煲又量杯等等好多好多做產品嘅用具、材料返嚟比我哋上堂用，真係辛苦晒！

呢兩個就係我今日嘅製成品。係根據老師比我哋嘅兩個cases, 按需要及療效，各人再mix自己嘅配方精油，之後就做出左邊嘅減壓又助消化嘅salves(應該譯作藥膏），我諗我而家萬金油都做到出嚟，哈~~~ 

右邊嘅係有消除肌肉疲勞、防抽筋、舒緩壓力的body sugar scrub in oil base。放學返到屋企有老公做大廚，我仲唔閃去沖個靚涼咩！馬上試用埋呢個產品，將自己全身磨一次，正呀！

以後屋企嘅空氣清新spray, 殺菌除臭spray, body scrub, bath salt, massage oil, body cream, gel, lotion, facial oil, shower gel, shampoo, salves都可自家製。可以純天然，唔使再買出面充滿化學成份和防腐劑嘅產品。

好期待明年三月嘅advanced course，300小時，應該會讀埋架啦！我已經叫老公儲定學費比我，哈~~~

Advanced course嘅學費係Level 1嘅三倍呀！好鬼貴耶！

Anyway, 我今日個lunch, Warm ginger chicken Baguette with salad。原來個ginger chicken係素肉嚟架！食咗三次先知！不過真係好好味，食到我上癮呀！以後要食又要專程去Delancey嗰邊，點算呀！

香薰治療課程（Day 3）

三個星期好快過咗，今明兩日又去上香薰課程。咦！一早出門就miss咗班地鐡，好彩最後都冇遲到。

首先Review 一下上兩當講過乜，之後就一邊講香薰精油嘅chemistry compounds , 一邊講解剩番落嚟嗰11隻香薰。我好怕chemistry呢part, 由細到大，化學呢科我又怕又討厭，真心冇天份係科學呢方面。

好彩聽聽下又明，每隻香薰精油有唔同嘅chemistry compounds, break down後就知道比例係點，屬於邊個family, 從而知道療效最強係邊方面。明白，即係由科學角度去了解和應用香薰精油。

到咗食lunch時間，又去番上次間小店食沙律。

嘻~~~大家冇眼花！我又食番呢個warm ginger chicken salad, 真係好鬼好味，食到停唔到咀，食完好滿足呀！今次我醒啦！冇叫咖啡，食完行過隔離街星巴巴買番杯我至愛嘅soy latte。

下午開始上堂又玩case study, 搵個同學仔做partner, 依對方需求，做一件適合對方生活style嘅product比佢，可以係cream, salve, spray, body sugar scrub, facial oil serum都可以，咁當然要加香薰精油係入面啦！

最係就要分享一下自己揀咗邊幾隻油，點解揀佢，治療focus係邊個方向，邊隻係coil oil, supporting oil and harmonizing oil, dilution 幾多%, 總之好有挑戰性，好好玩，超like ！

食完lunch後，話咁快又四個幾鐘，今日連break time都冇，好緊湊囉！明天係最係一堂啦！好唔捨得呀！

電子香薰爐

從一年前開始接觸香薰精油（essential oil)就係用傳統的蠟燭型香薰臺來燃點香薰。後來，有位研究香薰好耐嘅香港好友建議我用電子的，說比較安全，尤其係我屋企有小朋友。

一直沒的起心肝去找，有時逛街見到的電子香薰臺同樣是用熱力原理，蒸發已加進水中的香薰精油，不同處只係用電發熱而唔係蠟燭，但一樣會燒乾水，所以冇激發起我購物的神經線。

直到三星期前去上香薰治療課程，見老師所用嘅電子香薰爐。咦！呢個係我杯茶喎！恆溫設計，不用加水。於是乎又email下香港嗰好友，佢send咗一些香港那邊的網頁，內裏所賣的電子香薰爐正是這款啊！

就係咁我就上網找找，比我搵到這個同樣設計的。這款香薰爐英文叫aroma stone vaporiser, 唔使加水，直接把香薰油滴入爐上，插上電源，好快就聞到香薰氣味，而且是恆溫設計，溫度只是暖暖的，不會燙傷手，有小朋友多手亂摸都唔怕。不用加熱高溫係因為佢嘅原理唔係用高溫蒸發香薰油，而係用汽化原理。我已經用咗差不多兩星期，晩晚用通宵都冇問題，以前用蠟燭嘅就唔可以通宵用。所以我好滿意。

不過這款爐就一定要用真正香薰精油，唔可以用有雜質或fragrance oil，會壞爐架！而且fragrance oil 這些只有其味而沒有療效的香精，不聞也罷！

牛油果雞蛋沙律三文治

今日休息唔使返工，瞓到自然醒，超滿足。正想著整些什麼做下午茶，給兩個寶貝放學返來做茶點，見雪櫃有兩隻好熟嘅牛油果，正好配埋雞蛋做牛油果雞蛋沙律。

材料：

牛油果一個、雞蛋六隻、西芹粒半碗、低脂蛋黃醬兩湯匙、鹽和黑胡椒粉各少許

首先烚熟雞蛋，水滾下蛋煮八分鐘，將蛋浸入凍水中一陣，去殼放在深碗中。

雞蛋及牛油果用刀切碎（呢part要有些耐性）

牛油果粒及西芹粒放入雞蛋粒內，加少少鹽和黑胡椒粉拌勻，之後再加入低脂蛋黃醬再來個完全大兜亂。

之後就變成咁喇！放入雪櫃隨時一拎出來就可以做三文治食。要返工嘅媽咪可以整好放係雪櫃，咁小朋友放學返到屋企就可以自己整三文治食，放便到極。

至於可以點食！簡單啦！夾乜麵包都得。

好似方包，、熱狗包、彼得包、roll、hero等等。加些生菜絲、蕃茄片就更高纖更健康。

呢隻Hot dog 包有些特別，係加咗薯仔係入面，叫potato roll, 口感比較chewy, 我位小公主最愛。

噢！仲有可以將法包切片toast, 牛油果雞蛋沙律放係上面，一片一片排得靚靚咁，開party都唔失威架！

傳統蛋沙律用好多蛋黃醬嚟做，而蛋黃醬好高脂，比較唔健康。所以我加入熟透嘅牛油果，咁就可以將蛋黃醬份量減半，但同樣做到又軟又滑嘅口感，加上用低脂的蛋黃醬，咁脂肪又可以降低喇！

如果冇牛油果又或者閣下係唔鍾意食牛油果，咁點呀！都有辨法，就係用乳酪加蛋黃醬來撈蛋粒，同樣做到較健康嘅蛋沙律三文治。

烤蔬菜

如果你係我FB的朋友仔，你都會發現我超愛吃沙律，就好似上星期，我唔覺唔覺竟然連續六日，一日中總有一餐食沙律。其實生吃蔬菜水果先可以吸收到當中的酵素，因為酵素經過高溫一煮就消失掉。

三年多前嘅我係唔鍾意食沙律架！不過當時開始用宇宙飲食來瘦身減肥，實行每餐七成蔬菜三成主食，加上瘦身教主唐安麒叫我嘗試多吃沙律吸收酵素，只要身體酵素充足，就可以排走身體積落嚟毒素，身體潔淨就可加強代謝有助減肥。

就係咁我一家四口開始食沙律，食下食下全家都愛上咗，變成別人口中的食草一族，哈。。。

好多blog友仔話食唔落生嘅菜，有抗拒心。只要你open your mind, 用不妨一試嘅態度，就容易接受架啦！其實最大問題係你有多大決心去改變自己。

最近吃過一些沙律，內裏有一些焗蕃茄、彩椒在內，好好食呀！咁我又發揮我嘅段估廚藝精神，係屋企試咗幾次，成功啦！

我將d蕃茄切件，彩椒切粒，排係焗盤上，係咪好colorful 哩！齋睇都心情愉快呀！

用錫紙包住焗盤，放入已預熱華氏385度嘅焗爐，爐15-20分鐘就食得啦！

拎出放涼先放入沙律入面，碟沙律色彩繽紛，即時食欲大增呀！

意外地平日除咗蕃茄蛋湯會食蕃茄嘅小公主，竟然搶住食呢隻焗蕃茄，仲話好好味。而我幾個姨甥又肯食焗彩椒，因為佢哋話焗完嘅彩椒冇咗陣椒味，多咗清甜味。

如果你想改變自己，可以先試這種方法，加些水果落去都得。講多個小秘密比大家知，如果想逆生長，咁就要食多d生鮮蔬菜水果，只要身體越多酵素，又少毒素，你會發現整個人變得精神又輕鬆，樣貌仲會變年輕。減肥後嘅我就被好多blog友仔話後生咗10年。

隔離位係我相公，佢都減咗25磅架！佢食沙律仲多過我。如果女士們生吃蔬菜會寒涼，可以平日喝些黑糖薑茶來中和一下，就冇有怕。

晴天霹靂

今天重陽節，一早登高行山啊！

天氣真係超靚，藍天白雲，風都無耶！

中午之後就決定去大約45分鐘車程的一個大shopping mall血拼去。答應咗對寶貝兩星期，要兌現啦！要幫佢兩位買番d衭啦！因為著開嘅都變晒吊腳衭，好樣衰囉！

點知去到目的地真係晴天霹靂！！！

門口寫住Sunday is closed！天呀！人到癲呀！一個超大嘅mall Sunday 竟然唔開，玩咩！果斷地跳上車飛車去半小時車程嘅另一個outlet。

最後我對孖寶滿載而歸，但我竟然只係買到一條䃿，唔制呀！嗚~~~

見差不多六點，就食埋dinner至返歸啦！

呢個沙律加Grilled Salmon係我嘅！嘻...

數下手指原來我已經連續第六日，每日都有一餐係沙律。我真係瘋狂都咁。三年前嘅我係最憎食沙律架！宇宙飲食改變了我。

我位公主仲越來越擦得，呢塊petit sirloin一點也不petit, 咁鬼大塊，但佢食都冇得剩，仲食埋細佬一個mini burger, 我真係睇到O晒咀。大家咪以為左邊件肥仔只係食一個mini burger和兜apple咁簡單，佢撻咗我同佢老豆一人三分一件三文魚架！

佢兩丁友咁食法真係食窮我。仲有就係佢兩個嘅體重好快飛越我，只差less than 10 lbs, 暈。。。

懶人版叉燒酥

前幾日休假係屋企，接完件肥仔放學，見雪櫃有一小碗食剩嘅叉燒，又有隻小洋蔥，諗起之前見過澳洲blogger Christine 係佢blog分享嘅叉燒酥食譜, 就整叉燒酥做下午茶啦！

如果想睇Christine個原食譜，就跳入以下呢條link:
http://www.christinesrecipes.com/2013/03/char-siu-pastry.html

下面嘅做法係我消化咗個食譜再變型出嚟嘅，嘻。。。

話明懶人版就當然要快靚正，難度又唔高啦！首先預熱焗爐，set 華氏395度。

我碗叉燒太約10舊左右，切粒。小洋蔥半隻都係切粒。半隻都切都我標晒眼水。而塊現成係超巿買嘅急凍酥皮就要拎出來攤開，等佢軟身。

燒熱少少油，落一粒乾蔥頭粒爆香，下洋蔥粒炒至軟身，放埋叉燒粒炒多幾下，落半湯匙叉燒醬，水兩湯匙，炒勻後，依濃度用粟米水（一茶匙粟粉、一湯匙水）埋獻，上碟放涼。

急凍酥片軟身後可隨意切成圓形、長方形或方形，原食譜是圓形。我則選擇將酥皮像九宮格般分割成九塊四方形，咁就成塊酥皮用晒唔會浪費。

放適量叉燒料在酥皮上，唔好貪心放太多，小心收唔到口呀！搽少少水係四條邊，斜角對摺，壓實封口，放係焗盤上，再掃一層蛋汁係面，焗好出來會金黄色好靚，最後用叉拮兩下，等焗時個酥皮透到氣。我屋企冇芝麻，所以冇放d係面。

好喇！入得焗爐，焗15-20分鐘左右。我焗到咁上下就靠對眼去段估，因為家家焗爐不一樣嘛！

變咗金黃色，脹卜卜就搞掂啦！

嗱嗱嗱！咪話我唔提醒大家，凡係乜酥物酥都超級肥架！一件起兩件止好啦！食肥咗咪賴鬼我兼掟我鳮蛋呀！

仲有係唔怕麻煩嘅烘焙高手，可以自己搓酥皮，街外急凍嘅預咗一定有防腐劑。明未？

食咗件超肥下午茶，dinner仲唔補下飛咩！

點呀？呢碟雞肉沙律個賣相得唔得先！喪食唔怕肥，最緊要識補飛！

重拾Blog Blog趣

九月初正忙於搬屋又病到九彩時，見到丫烏blog公告年尾摺埋，叫所有blogger想保留心血就要幫個blog搬家。當時真係媽媽聲架！我呢d電腦白痴，搬blog咁高難度嘅嘢仲唔玩C我。好彩見到d有心人係blog分享做法，研究咗一輪，最後將個blog搬咗嚟呢度，但做錯某個step, 文字和留言都過晒嚟，但d相衰咗，家陣只好慢慢upload番d相上嚟。

Anyway, 經過個多月，我反而要多謝隻丫烏，因為blogspot呢邊真係超方便又好用，好過隻丫烏多多聲，唔怪得之佢要玩完。自從兩年前丫烏upgrade之後，我已經唔多鍾意用，奈何自己2010年開始寫blog 就用佢，用開有感情，所以冇諗過搬。

兩年前開咗店之後已經無乜時間寫，舊年全年先得十幾篇。但搬完blog過嚟呢邊，一個月就已經寫到呢個數。原因係blogspot有手機app Blogger, 用手機寫blog 超方便，連相都可以upload埋，正到痺！最重要係坐車返工d時間都可以寫，唔使好似以前咁一定要開電腦，坐定定寫，呢點我超like。

識得我耐嘅blog友仔都知我係唔識中文輸入法，我每篇blog都係用手寫版逐粒逐粒寫出嚟架陰公。真係有血有汗，粒粒皆辛苦架！

發現可以用手機app寫blog之後，呢排越寫越開心，好似返番去初初寫blog嘅日子，個感覺返晒來。想當年一班係丫烏嘅blog友仔，晚晚大家四處巡blog, 鬥快做第一個留言嘅人，一齊分享生活點滴，又為減肥瘦身互撐，真係好開心。

我終於發現原來自己真係好鍾意寫嘢，好enjoy透過文字去分享，我重拾寫blog嘅樂趣。不論而家讀緊呢篇blog嘅你係舊blog友還是路經此blog嘅新朋友，都可以留個言show up下。舊blog友仔最好通知埋我你個新blog地址啦！等我catwalk 過你樹嘛！

麵包布丁

見到屋企有幾塊乾乾地嘅白麵包食剩係樹冇人吼！

為免浪費食物兼家陣通脹高企，點都要慳家d, 將佢嚟個大變身。

最易當然係整bread pudding啦！又易又快又好味。今次仲有兩隻嘩鬼幫手，就來個親子活動在kitchen啦！鍾意食就要學識點整，就算啊媽心情唔靚罷煮，你哋都可以靠自己啊！哈~~~

先講材料：
隔夜白方包4塊（新鮮嘅都得，麥包、提子包、乜包都得）
牛奶 200ml
無鹽牛油 20-30g （唔落都得但冇咁香）
雞蛋 3隻
有機砂糖 35g （這個是少甜版，喜歡甜些自己落重手d)
雲厘拿香油 數滴（可以唔落）
提子乾 3湯匙
糖粉 少許

做法：

1）先預熱焗爐華氏385度。

2）麵包隨意C開成小塊。

3）牛油用熱水坐溶，再係爐盤抹上一層已溶牛油，平均放上麵包塊。

4）雞蛋打勻分兩次落糖，打勻至糖溶。

5）牛奶煮至微暖，唔係滾呀！記得睇火。

6）之後將牛奶分三次加入蛋汁中拌勻。倒埋牛油及雲厘拿香油放埋落去搞勻。

7）再倒上麵包面，灑上提子乾。靜待10分鐘，等麵包索晒d蛋汁。放入焗爐焗30分鐘至金黃色。

8）出爐稍涼灑上糖粉，搞掂食得！

一出爐差d相都未影就俾人食咗，轉個頭已經冇咗三分二。本來無人吼差d去咗垃圾桶嘅食物，家陣頓時變得好搶手。

噢！最後講多句，鍾意肉桂味嘅可以加d肉桂粉，但我兩隻為食小魔怪唔鍾意，所以我冇落。