5月31日

今朝上磅數字係:  115.60

早餐(9:30):  暖水一杯, 蘋果一個

       (10:30):  橙半隻

午餐(1:30): 雜菜雜果沙律一碟, 凍奶茶半杯

Snack(4:30): 橙半隻, 蜜瓜切粒一碗

晚餐(7:00): 雜菜雜果沙律一碟

Snack(8:30): 西瓜粒一碗

今日黎個全菜日補飛, 老公今晚下廚, 十年唔逢一潤, 整左個靚靚愛心沙律比我, 抵鍚, 真係好鬼死多料, 有生菜, 士多啤梨, 黃椒, 蘋果, 藍梅, 青瓜及金色奇異果, 連沙律醬都唔使落, 食完呢大碟沙律, 飽到上心口, 邊個話齋食蔬果唔飽架, 勁飽呀!

唔知搞乜, 115.6呢個數字, 跟左我4日, 唔上唔落, 我有諗過個磅係咪short左。

好彩冇應承個妹今日去Bronz Zoo, 今日仲熱過噚日, 企出街耐D都俾太陽伯伯溶左, 望下自己真係哂黑左少少, 賣桔lor, 拿拿林敷番個美白mask, 好明顯我係indoor人啦, outdoor活動唔係咁岩我, 除左做廿四孝阿媽時, 冇得揀lor。

尋日post左D近照上blog, 好多blog友留言鼓勵, 其實我仲要努力, 唔好讚壞我, 我係得塊尖尖地既面呃得下人, 手臂拜拜肉, 腩仔肉仲跟住我, 小蠻腰失散多年仲未搵得番, 好彩阿媽生得對腳叫長少少, 但大脾D肉仲有D鬆鬆地。

我有諗過要做機修型減吋數, 但NY既美容院收得貴, 效果又麻麻, 我再信唔過佢地, 記得小公主同小王子出世後, 都做過LPG M6機減肥, 但佢地齋叫你做機減, 又唔識教你跟飲食, 齋做機減破產都似, 所以兩次我都只係做左20次, 減左6-7磅左右, 最慘係小王子出世後個次, 個妹妹仔美容師應該係經驗唔夠, 後來我發現左右腳不對稱, 仲要衰到右邊大脾比左邊肥半吋, 但右邊小腿又比左邊幼四分一吋, 上下左右都唔對稱, 搞成咁, 死未, 仲點敢交個body比佢地呀!