新年前夕

呢兩日勁忙, 連個blog都冇時間updated, 只因要係過年前準備好一齊應節用品, 做主婦嘅真係忙上加忙。

琴日收工後, 的起心肝幫間屋嚟個終極大掃除, 又洗又抹, 換完床單換sofa套, 架洗衣機乾衣機都冇得停。我對寶貝間房至無得頂, 呢對垃圾婆垃圾佬, 收埋收埋啲嘢唔捨得扔, 玩具又多過人, 要我咆哮佢兩位先去執, 搞咗幾粒鐘, 全屋都乾淨晒, 感覺清新, 迎接新一年, 貼埋揮春, 加多些少新年氣氛, 正呀!

為怕今明兩日落大雪, 琴日放工仲抱住一大束花, 好輪盡咁搭車返屋企。本來想買桃花, 但今年唔知係咪天氣關係, 連啲花都貴過人, 一棵小小的桃花要六七十蚊美金, 我舊年嗰棵差唔多size只係四十八蚊之嘛!

最後我只係用十二蚊買咗呢束康乃馨作為今年的賀年花, 應一應節, 取個好兆頭, 來個花開富貴。

今日day off, 所以作最後努力, 買埋啲年貨及入番啲餸菜。 個Brooklyn唐人街啲人多到厘!  梗係啦, 周圍啲雪山令人舉步難行, 之前好多人想出嚟買嘢都出唔到嚟, 尤其係老人家添。

今日都落毛毛雨架, 仲寒風刺骨, 但明日年三十晚又話落大雪, 仲唔趁今日仆出去買齊晒啲嘢, 明日啲擋口唔開門, 想買都無得買呀! 今日我買生菜, 菜心時, 個賣菜啊叔係樹大聲叫人有買就趁手, 明日落大雪唔開擋咁話。

其實以住新年大多數出街食, 大家都知我厨藝有幾高, 又唔識整九大簋, 但為免一陣真係又嚟場大風雪, 買定隻雞穩陣喎! 如果唔係年初一要食即食麵咪弊!

至多跟住教主教嘅賀年菜式, 整番碟冬菇紅棗蒸雞。本來想學教主味籚筍蒸龍蝦, 但我唔識點搞掂隻龍蝦, 費事比隻龍蝦搞掂我, 所以我轉軚買咗大隻嘅老虎蝦, 我諗開邊照樣咁蒸, ok卦!???

今年樣樣嘢都貴咗, 賀年糖果餅乾唔買又唔得, 物價飛升, 但點解打工仔嘅人工又唔見升嘅呢! 

有啲無良老細年初一都要員工返工, 仲無補水無補假, 離晒譜, 個受害人咪係我大嗰位啊妹囉, 呢邊已經冇乜新年氣氛, 家陣連大年初一都唔放假, 開少日鋪唔會執笠卦, 亦唔見得會發達囉!

Anyway, 希望踏入兔年, 大家都行運, 開心快活, 身體健康!