趁住開學前, honey決定帶對寶貝參加兩日一夜巴士團, 去美國首府華盛頓DC, 今次加埋老公其他家人, 一行十人, 星期六浩浩蕩蕩咁出發。
晨早六點起身, 食埋奇異果做早餐, 七點出門, 七點半到Manhattan Chinatown, 泊好車去收費停車場, 接埋老爺奶奶, 行到去集合地點, 導遊先生及巴士都已經到左, 點好名上車等出發。
點解等左20分鐘都未開車, 詢問導遊先生, 佢竟然話有五位團友係皇后區既Chinatown塞緊車未到, 要等埋佢地先可以開車出發。
唔係化, 仲塞緊車未到? 
做乜D人咁無時間觀念架? 8點係出發時間, 8點20分你地仲係on the way。
最後我地係8點45分先出發。
坐左兩小時, 到第一站賓夕凡尼亞州既費城, 參觀獨立宮及自由鐘, 呢兩個景點我地已經去過, 所以無乜驚喜, 但呢兩樣野係美國開國歷史上好有代表性的。小公主曾經要交功課, 寫過份報告係關於自由鐘既。
係1790年至1800年, 費城係美國首都, 直至華盛頓DC興建好至搬過去。
呢個應該係獨立宮喇! 點解講應該? 因為我地位「專業」導遊, 放低我地之後, 只係記得叫我地準時返黎上車, 之後就唔見左影啦! 真係無得頂! 
望到個自由鐘嗎? 太多人喇! 我地無迫入去, 只好係出面影番張留念就算。
呢架車叫Trolley, 維多利亞式, 90分鐘city tour, 收費係成人US$27, 4-12歲兒童US$10, 既然冇時間坐番轉, 唯有影番張相啦! 你睇佢兩位個look, 幾似遊客。
呢架童話式夢幻馬車, 只要你肯比30大洋, 就可以1-4人坐上去遊番20分鐘。
嘩! 個位「專業」導遊催人上車啦! 搵人拿拿林幫我同honey影番張相先。
上番車, 望下手機, 就黎12點喎, 應該帶去食lunch喇掛。班細既已經叫肚餓。
我冇估錯, 下一站真係去食lunch, 不過估唔到個導遊話車程係45-60分鐘0者! 做乜唔係費城唐人街食呀! 但呢個團係NY首創包三餐既巴士團, 我地只好跟著走。
終於到啦! 原來係食自助餐。
走一圈望望先, 好彩有好多菜同菇, 最後揀左食菜及海鮮, 跟到宇宙, 好開心。呢兩碟就係我既午餐, 左面既有粟米, 比我揀走左, 連炸蝦既脆漿皮都去埋, 仲有碟水果無影到就比我食左啦! 連汽水都冇飲, 飲自已帶個支水, 今餐超宇宙呀! 掂! 
2點食完晏, 導遊先生話下一站係到華盛頓DC, 乘坐波多馬克河船, 欣賞首都兩岸既風景。車程係一個半小時, 仲話要趕4點鐘班船。
本來車程長D係預左架喇, 但冇諗過司機阿姐會帶我地遊花園囉! 朝早見係女司機仲同外甥女講, 話女人開旅遊巴, 勁喎! 點知讚錯左。
3點45分出highway, 心諗4點班船實趕到啦! 點知入到華盛頓DC, 位司機阿姐不停兜圈。佢玩唔識路, 唔係化?
呢個街角我經過左三次。
佢仲要專行細街, 梗係望到Do Not Enter既路牌, 兜到4點20分, 開始有團友忍唔住開聲問, 位導遊又答唔到, C未! 
最後佢再轉番上highway, 行多一個exit出去, 至搵到果碼頭。
4點45分, 終於上到船啦!
咁辛苦至上到船, 點都要影番夠本, 團費唔包船票, 要另收每人22蚊架! 坐一粒鐘, 都幾貴, 但D細既未坐過, 等佢地見識下兼開心下。
阿女, 乜你咁好pose, 扮0靚模呀!
等我都係船頭影番張靚相先!
好熱, 走返入船艙嘆冷氣, 再黎張全家福。
落左船, 位司機阿姐又唔知去左邊樹, 人等車, 曬左我15分鐘。
我已經曬黑左好多, 再曬變朱古力架啦!
(待續)
華盛頓DC之旅(二)
想健康瘦身既你, 快D加入Angel's angel 成為安麒天使, 互相鼓勵, 分享瘦身喜與樂, 齊齊走出自己的美麗人生。
係好遠既地方帶番黎既! 
