茄汁三文魚扒

茄汁三文魚扒

話說小公主有日拎左教主本「自然健康排毒」黎睇, 見到入面其中一個菜, 茄汁三文魚扒, 呢個為食貓見到呢幅圖片, 睇到流晒口水。

跟住走埋黎同我講:「媽咪, 你睇呢碟三文魚幾正。」

咁我問佢:「好正又點呢?」

佢兩眼發光, 笑咪咪咁問:「搵日可唔可以整比我食呢?」

我話:「嘩! 你當自己係餐廳, 拎住本menu黎點菜呀? 你又知我實識整?」

佢竟然話:「你唔係話過教主教整既食譜都好簡單易整既咩?」

心諗C喇! 乜我有咁講過咩?

冇計, 唯有答佢:「好喇! 等閑整過你食啦!」

今日佢又好似債主咁黎追我債。

好啦! 好啦! 煮就煮啦! 應該煮到掛。

我跟足做法, 原來真係唔難, 幾易handle, 就算初哥都應該攪得掂。

先用葡萄籽油煎香件三文魚扒

再爆香蒜頭洋蔥

加埋D蕃茄粒, 落埋其他調味料及水煮一陣

個汁就ok喇!

呢味餸煮過兩次, 個look同味道都見得下人, 我用左紫洋蔥, 煮熟後好甜, 連我對平日唔肯食洋蔥既寶貝, 都話D洋蔥好甜, 肯食喎! 可能係個汁甜甜酸酸好開胃, 好0岩夏天食。

Angel, 你不單止改變了我一家人既飲食習慣, 更令我發現原來要整D健康好味既菜餚, 可以好簡單, 再一次証明你再改變了我, 連我呢D「無飯主婦」都肯多試一些新菜式了。