黄金鴛鴦蝦

黄金鴛鴦蝦

嚟嚟嚟..., 瘦身廚房今晚又開爐喇!

而今晚既菜式係黄金鴛鴦蝦, 齋聽個名就知道掂啦!

呢期同南瓜國王拍拖, 成日掛住佢。

材料: 南瓜1斤, 蝦仁3両, 蝦米1湯匙, 蒜頭2粒, 葱粒半湯匙

首先將南瓜去皮去籽, 切厚片。

(去皮係全個過程最艱巨既, 開山劈石咁, 鬼叫我揸雞都無力咩, 失敗!)

蝦米洗淨, 用水浸軟, 蝦仁就用豉油及糖各半湯匙, 生粉半茶匙, 少許麻油及2湯匙葡萄籽油醃一陣。另將蒜頭剁碎。

好喇! 真係開爐啦!

先燒熱隻鑊加1湯匙葡萄籽油, 爆香蒜粒與蝦米(好鬼香呀)。

再加入南瓜炒一陣。Easy job, 冇難度呀!

再落鹽3/4茶匙, 水3/4杯, 加蓋炆煮5分鐘至南瓜變軟。

再放入蝦仁炒熟, 最後落葱粒(我冇落, 因為唔記得買葱)。

攪掂, 快靚正, 開飯啦!

係咪超易整呢, 教主啲健康簡易食譜, 真係阿茂都變厨神呀!

拎住教主啲天書, 地獄厨神都變咗天使厨神, 絕對唔會攪到個厨房着晒火。

班長綠茶話我哋呢啲係地獄厨房hea咗咁耐既小天使要升呢啦!

呢碟黄金鴛鴦蝦, 我屋企三位老細好滿意, 成碟幫我清晒。