食物過敏?!!!

OH, MY GOD! 我塊臉啊!

昨晚飯局回家, 寫blog時覺得右耳背有啲痕, 唔通比嘢咬咗啖, 無理佢。無幾耐, 點解對眼頭位置又痕痕地, 又嚟花粉敏感, 繼續無為意。

到12點幾, 瞓覺前望吓塊鏡, 做乜隻左眼皮腫腫地, 唔理啦! 上床瞓。

C囉! 點解對耳仔咁痕, 跟住到下巴再到條頸, 好痕呀! 係咁R, 攪到點半都未瞓到。

 攪乜科痕到人到癲, 唔通自己敏感?

諗吓自己dinner食過乜, 有菜, 蝦, 龍蝦, 我平時都食架啦! 咪住, 仲有碟炒花蜆, 應該係佢啦! 上年返鄉下, 小王子又係食呢隻花蜆攪到全身出疹。唔係化? 我食咗十隻八隻咋喎! 唔係咁玩我呀!

即刻起身去厠所照吓塊鏡! 係嗰刻, 我想尖叫, 但半夜三更唔敢叫, 我怕隔離屋以為發生命案! 我對眼勁腫, 下巴同條頸又紅又一 tar tar, 食物過敏都係body好啦! 家吓主攻我塊臉, 天呀! 咁既衰樣, 明日點去party, 諗咗陣, 立即揾粒過敏丸食, 希望明日無事見得人。嗚~~~又要食西藥, 唔制呀! 

碌到半夜三點都未止痕, 我都唔知自己幾時瞓着。

今朝對寶貝返中文學校時, 我仲成個豬頭咁, honey叫我瞓多陣, 佢攪掂對寶貝返學。

家吓瞓醒, 好似好番少少, 希望晏啲無乜事, 依家要去執番好嗰衰樣, 費時一陣嚇親班親戚, 就唔係幾好意思啦。