10月12日~ 回歸第一天

10月12日~~~ 回歸第一天

係HK喪玩兩個幾星期, 昨天下午終於回歸, 返到屋企, 但超級攰呀!

莫非我真係玩到無晒電, 瞓咗8粒鐘仲十吓十吓咁, 真係要叉番足電至掂呀!

唔係點執番掂間屋, 我三位老細真係~~~~冇得頂!  我真係要攪番兩日至得呀! 不過我走之前己經知道, 出得嚟wet, 預咗要還。

今朝晨早就要車兩隻麻煩友返學, 再去超市入貨, 屋企嗰雪柜好似比人洗劫完咁, 空空如也, 乜鬼都冇。你哋唔使食得咁盡, 仲要懶到唔入貨呀!

其實昨天班機已經早到差唔多成粒鐘, 但landing 前嗰20分鐘, 架機「浪」得好厲害, 拋到我暈吓暈吓, 真係暈住咁落機呀陰公, 仲要去pick up番兩件行李。

最慘係其中一件紅藍白竟然玩爆破 , 係HK boarding入閘時, 航空公司已通知咗我件行李爆開咗, 但佢哋巳幫我再用膠袋pack好, 叫我唔使擔心。

嘩! 唔擔心至奇, 點知有冇唔見嘢。好彩返嚟點算吓, 應該冇嘢唔見咗, 只係有啲嘢, 攪到變晒形啫!

你哋睇吓隻袋, 成件死C咁, 我喺行李帶上見到時, 真係暈係樹冇眼睇, 仲好辛苦至抬到件嘢上行李車推出去。仲有就係家吓係機場要用5蚊美金至拎到架行李車, 作C 咩, 又加咗價, 同打劫無分別, 但要用就焗住比人搶。

我都無辨法唔話自己叻, 兩件行李都冇超重, 啱啱四十九點幾磅。 Last day叫住自己唔好買嘢, 唔入鋪頭, R爛手腳都要C忍, 如果唔係實超重。

你哋睇吓我有啲Ankang產品攪到扁晒, 珍妮貓送比我兩個寶貝嘅蔬菜片呀。

肉痛C我, 睇真啲, 好彩只係嗰盒扁咗, 入面冇事, 嚇C我囉!

最搞笑係小王子接咗我機, 上咗車之後細細聲同小公主講: 「Mommy looks the same!」

小公主係樹狂笑, 我問小王子點解咁講, 佢話daddy講mommy返嚟會變靚咗, 靚到佢唔認得咁話。作C 咩! 你哋家陣當我返HK整容嚟呀! 唔認得我! 係咪玩嘢呀!

落機時個衰樣係殘爆至啱, 殘到唔認得就有份。