12月16日飲食日誌

9:00am   蘋果一個

10:30am 香蕉一條

12:30pm 紅蘿蔔牛蒡瘦肉湯一碗 + 紅蘿蔔牛蒡湯渣 + 朱古力疍卷一件

3:30pm  炸薯條10幾條 + 熱咖啡一杯

4:30pm 荷葉草本茶一杯

5:30pm 紅蘿蔔牛蒡瘦肉湯一碗

6:30pm 啤梨一個

7:00pm 清炒菜心 + 牛肉丁炒飯半碗(走牛肉丁)

8:30pm 水柿一隻, 木瓜半個

睇weather report, HK氣温跌到6℃, 大帽山清晨仲結霜, 得零下2度, 各位HK嘅天使姊妹們, 謹記要著多件衫, 圍埋頸巾帶埋冷帽至好出門, 千祈咪係聖誔佳節前冷親, 咁就唔抵啦!

NY呢邊仲激, 零下6度, 睇吓呢支水, 係我今朝車對寶貝返學時發現, 已經變成一舊冰喇!

天氣凍, 會令人份外想食熱嘢, 見今日day off, 再嚟煲住家靚湯比三位老細潤番吓! 明日返工又會忙幾日至放假, 中午前煲好, 等我都嘆番碗先。

放學時, 老友接埋我, 齊齊去接放學, 之後一車人去咗漢堡王, C得, 忍唔住食咗炸薯條添!  又要排毒啦!

其實見茶茶嚟個果汁斷食, 好似好正咁, 但我見天氣凍成咁, 未有勇氣試住, 等天氣暖番d一定要試吓!

小公主個衰妹, 呢排見佢成日拎教主本「自煮瘦身便當」嚟睇, 我又唔敢問佢, 我怕一問佢, 佢又嚟玩點菜, 咁我點算吖!

今日放學做功課, 我又見佢拎住教主本天書, 我終於忍唔住問佢搞邊科, 原來佢呢排有功課係要揾食譜嘅, 佢抵C到識係教主本天書度揾, 仲好得戚咁話教主本書最尾個section係有所有食譜嘅英文版, 啱晒佢用咁話, 真係比佢吹脹兼暈低!

晚餐罷煮, 唔係我懶, 係我要罰我honey, 拖佢隻豬仔出去巡番轉, 皆因佢竟然唔記得咗噚日係我哋嘅結婚紀念日, 換轉平時呢個係C罪。 但今年我都差d 唔記得咗, 算啦! 放過佢, 但點都要帶啊豬仔出嚟見吓人。

等兩位寶貝學完琴, 巳經六點九, 走唔得遠, 最後近近地去食越南餐, 我見小王子話要食牛肉丁炒飯, 咁我咪叫碟菜, 諗住分佢半碗飯就算啦! 食到尾聲至醒起自己lunch食咗澱粉, 今日冇食肉添, 早知dinner唔食飯, 食番塊越式豬扒啦! 唔制呀!

P.S. 臨瞓前, 排毒三次, 我諗係碗炒飯作怪, 油咗d囉!