12月5日飲食日誌

瘦身成功後, 冇再係blog寫飲食日誌, 但呢兩個星期我會寫番, 因為我要撐我嘅戰友綠茶, 佢呢三個星期出走宇宙村, 蕩失咗路, 比啲魔鬼引誘狂吃毒物, 結果係肥咗唔知5磅定8磅!???

佢今日開始排毒大計, 要用兩個禮拜, 踢走肥咗個幾磅, 我當然要用行動支持佢, 我答應陪佢一齊係呢兩個禮拜再寫飲食日誌, 講得出要做得到。雖然我今日去咗行街街, hea足一日, 家陣超眼瞓, 但我都要mark低今日吃咗乜。

10:30am  抗氧酵精 30 ml, 木瓜半個 

1:15pm  灼菜一碟, 奶油多士一件, 生炒牛肉飯半碗走牛肉, 冰鎮奶茶一杯

7:00pm  西冷牛扒 + 西芥蘭及四季豆 + 水牛城雞中翼一隻 + 炸雞塊半件

9:30pm 夏桑菊冲劑一碗, 啤梨一個

11:30pm 排毒酵精 30ml

基本上我今日都宇宙得唔合格, 做唔足三七比例, 午晚兩餐唔夠菜, 晚餐又為食, 食咗兩樣肉類, 所以返到屋企補番隻啤梨再啪多30ml 排毒酵精補補飛。

所以話瘦身期間寫飲食日誌絕對有幫助。雖然我今日都义咗半隻腳出村, 但我都要如實報導。

其實今日hea得好開心, 一家人再加埋啊妹出去行街街, 雖然唔係買啲乜, 但我呢位成日扮忙嘅啊妹, 約佢去行街差唔多要make appointment。我都話我好易滿足架啦! 我今日就好開心架啦!

但有一件事唔多開心嘅小插曲, 就係小王子今日驗眼, 佢竟然~~~玩近視, 要載眼鏡, 變身四眼仔, 暈得。