12月17日飲食日誌

7:45am   抗氧酵精 30ml

10:00pm 冲繩黑糖薑茶一杯, 木瓜一個

天氣凍, 飲番杯薑茶人到暖啲, 加上我哋呢啲宇宙人食沙律, 蔬果多, 飲啲薑茶可以中和下, 唔怕寒凉。呢盒去皮切塊嘅木瓜, 係我honey準備比我嘅愛心早餐嚟! 後面嘅保暖杯係返工必備之物, 今晚我就焗緊紅棗杞子水, 聽朝拎返公司又可以慢慢嘆, 暖笠笠。

12:30 白灼菜心 + 三菇水晶粉

又同細妹share lunch, 但呢個水晶粉認真麻麻, 痴埋一pat, 唔知想點, 齋深色但冇乜味, 下次千祈咪叫, 所以食得唔多, 諗住今晚家庭飯局, 留肚算數。

2:30 蜜糖水一杯 + 香蕉一條

轉頭就肚餓, 好彩仲帶咗兩條蕉返工, 點都好過食餅乾零食, 細妹仲醒, 帶咗盒雜梅返嚟, 有blueberry, raseberry & cransberry, 夠晒抗氧吖!

5:00pm  香蕉半條

點解食半條? 因為寶貝姨甥仔嚟咗office, 我啱啱咬咗啖, 佢又想食, 咁分蕉同味囉! 

7:00pm 冬至家庭飯局@酒樓 (菜+肉+海鮮) 冇宇宙

次次大圍人食飯梗係太開心就失手, 小王子仲鬼咁大聲話我犯規, 搞到成枱人望實我, 真係失禮。

8:45pm 啤梨一個

返到屋企補多個啤梨, 呢排啲啤梨又冧又甜, 勁好味!

10:00pm 排毒酵精 60ml (補飛)

嚟多60ml 排毒酵精先冲凉, 希望教主巡blog嚟到見到唔好篤手指就好啦!

嚟緊呢兩日又會忙啲, 因為細妹仲有兩場講座, 但經過last weekend之後, 有經驗, 知道要準備乜, 可以再好啲, 所以今日唔算太忙, 冇好似last weekend咁, 又忙又亂甩晒轆。

我等陣覺覺豬嘅時候, HK班天使姊妹就開P, happy緊, 成五十幾人, 勁呀, 一定好好玩, 但我冇份囉!

茶茶叫我同佢哋一齊尖叫, 但我半夜三更尖叫, 我怕隔離屋會報警, 以為有命案, 一係就捉我去瘋人院囉! 所以各位有份趴地嘅姊妹, 幫我叫埋再玩埋我個份, 記住盡情玩得開心啲。