非一般的平安夜

話說昨晚小王子已經有d 唔舒服, 到半夜2點, 我發現佢開始發燒, 只好叫醒佢食退燒藥。啊寶貝, 佳節當前, 你竟然玩病, 咁即係玩我啫。攪到我成晚都冇覺好瞓。

咁到未算, 我位honey老細返咗半日工, 中午返到屋企無耐就話唔舒服, 之後仲又痾又嘔, 暈足全日。天呀! 你兩位大爺係咪夾埋一齊嚟玩我架!

估唔到平安夜無得happy不特止, 仲要做啊四服侍呢兩位大爺, 點解我放假仲忙過返工呢!  我即刻同小公主每人啪番粒維他命C丸, 打定底先。

諗住呢兩日做無飯煮婦, 乜都冇買, 最後唯有去超市入貨, 唔係餓C都似。攪掂兩位病到八彩嘅老細食粥, 唔理咁多, 帶咗小公主出去lunch撐枱腳, 再買番d 餸補倉。

小公主個衰妹不知幾好胃口, 自己吃咗一碟海南雞脾飯再加半個印度麵包。honey, 你真係揾少d 都唔掂呀! d 化骨龍真係可以食窮你。

我自己食咗碗蝦湯米粉。叫咗個waiter幫我走肉片, 但上枱又係有, 唯有自己走。

因為遲食lunch, dinner time都未覺餓, 只係煮咗個菜心肉絲湯烏冬比小公主, 我自己就陪兩位大爺食青菜粥水。

估唔到呢個就係我2010年嘅Christmas eve dinner。唉! 真係夠晒清淡。人家原先諗住今晚去食日本餐架嘛!

好彩仲有碗教主教落嘅補身瘦身湯飲吓, 慰藉心靈。嗚~~~

而平安夜嘅節目就係吸塵抹地加執屋, 真係悶到發癲。

小王子休息咗一日好似好d, 雖然仲有微燒, 但最少有胃口食嘢。但我位honey老細仲暈吓暈吓咁, 瞓足大半日, dinner連粥水都冇胃口吃。

喂! 你兩位唔想陪我今日去血拼, 都唔使玩病嚇我架!

唔該兩位聽日瞓醒就精神爽利, 我唔想聖誕節要係屋企"out"冬菇。

PLEASE~~~~~~~