紐約暴風雪

嘩嘩嘩! 呢勻真係唔止大風雪, 係暴風雪!

仲要係Boxing day, 美國Northeast嘅州全部變成白色一片! 天氣預測話會一路落到明日傍晚, 唔係化? 咁咪落成30粒鐘!

今朝十點返到公司仲未落雪, 但十一點appointment嘅客上嚟, 已經話開始落雪喇! 一點lunch後, 我同細妹一齊望出窗外, 見到啲雪又密又大, 巳經驚緊6點收工時, 出面情況唔知會變成點。

你哋可能會覺得使唔使如臨大敵咁呀! 但真係需要架! 家陣唔係落場三兩吋嘅雪咁簡單, 係暴風雪, 今次預計NY City會有15-20吋積雪, 諗吓都暈咗半!

呢啲情況, 搭車返屋企嘅人未必有公共交通工具, 遲收工會好大鍾。因為一有呢啲壞天氣, 啲地鐵會改路線及停駛, 可能用平日雙倍時間都未必返到屋企。咪以為揸車好隱陣, 一樣咁衰, 要warm up架車再掃走車身上嘅雪, 搞一大輪已經好煩, 落雪地面又滑又跣, 人人慢駛, 一有accident就塞餐C, 最慘遇上架車C火或困住咗, 仲要call 警察叔叔嚟救你, 天寒地凍, 嚟到救你都變咗雪條啦。

四點appointment嘅客cancel booking, 英明嘅細妹决定提早兩粒鐘收工, 拿拿林齊齊執嘢閃, 細妹怕地鐵會亂晒龍, 所以話車我返歸, 其實我又好驚佢架smart car車仔載完我返屋企, 到時啲雪再積厚啲, 佢唔知點行番佢自己屋企。但最後佢都係載我返去先。

好, 就等我係度同大家直擊報導吓現場實況。

呢張相係下午4點幾影嘅, 架車係曼哈頓橋上慢駛, 條路好滑, 行快少少都跣軚。

返到屋企門口巳經變成咁, 望吓地下嘅脚印就知啲雪有幾深, 我唔敢諗聽日變成點!

返到屋企先知小公主堅持下午去咗同學仔屋企做science project, 雖然只係隔幾條街, 但出唔到車, 我要行去接佢返嚟! 天呀! 做乜咁玩我。honey老細話等佢去接, 吓! 唔好啦卦, 你C吓C吓咁暈咗兩日, 啱啱至好番啲, 等陣再冷親咪仲大鑊。大風又大雪, 真係可憐天下父母心。

5點半, 天都黑晒, 條街冇人又冇車, C城咁, 條馬路上嘅雪已經比啲車轆到實晒, 又滑又跣, 到溶雪時, 變埋室外免費溜冰場。

我就係咁一仆一碌摸黑咁行去接小公主, 啲雪吹到塊面應一應, 打開個口就即時有綿花冰食, 全副武裝都頂唔緊。

終於行到佢同學仔屋企, 相中位啊叔係樹好努力咁剷緊門前嘅雪。屋主係要負責剷走門前積雪, 如果唔係有人係佢門口跌親, 係有權告屋主拎賠償嘅。今次落兩日一夜, 真係剷幾十次都未掂, 可怕過啲黄葉吖。

小公主冇著boots, 行咗一段路, 褲鞋都已經濕晒, 個儍妹叫我影底呢張相放上blog, 比大家睇吓啲雪有幾深。

嚟多兩張, 唔好怪我focus得唔好, 其實影呢d相時, 我對手已經凍到硬晒, 冇乜知覺, 架手機仲要俾風雪吹殘緊, 我都怕會凍C佢。

返到入屋, 個衰妹仲夠膽話明日要再去繼續佢個project, 我即時想踢佢埋牆角打, 係你daddy先會比你今日行出門口, 你試吓再大風大雪未經我批淮再走出街, 我一定煮碟炆豬肉過你嘆!