暴風雪後的一天

今朝八點瞓醒望出窗外, 只係睇到白色一片, 但係已經停咗雪。好囉! 落20粒鐘都搞成咁, 若果真係落足30粒鐘, 真係不敢想像。

大家睇睇啲車, 真係可以消失於雪中, 我架車個車頭比啲雪冰封咗, 我諗成個禮拜都唔使出車啦! 好彩呢個week唔使返學, 如果唔係都唔知點算, 車又出唔到, 行又行唔到。

睇見出邊路面情況咁差, 應該會冇地鐵搭, 細妹都冇可能揸到架車出office, 立即call佢睇吓點, 最後决定call 啲客人取消晒今日嘅booking。唔使返工, 乘機唞多日, 見未夠九點, 上床再瞓過。一瞓返就三個鐘, 爽呀, 精神晒。

再望出窗外, 藍天白雲, 對面屋有幾個人係度出盡力咁剷雪, 其實啲雪厚到咁, 都唔知剷去邊樹好。望吓左邊個人, 啲雪厚到佢大脾位, 好似話總共落咗20吋。但未break record, 2006年2月個暴風雪係兩日落咗26.9吋。

呢幾位人兄係咁將啲雪剷出馬路中心, 雪山咁, 如果有車轉入嚟我哋呢啲細街, 見到座雪山都唔使旨意出得返去。

今次呢場雪, 我係完全唔知道, 所以事前冇去入定貨, 如果往後幾日仲係咁, 斷糧都似。今日下午食咗碗即食麵, 唔使十五分鐘就頭痛, C未, 味精毒物真係少掂為妙!  最後我頂唔住, 啪咗30ml排毒酵精, 點知過咗半粒鐘個頭就唔痛, 唔知係咪啲酵精解咗啲味精呢!

下午三點, 我位honey唔知係咪"out"足三日, 見今日好番啲就身痕, 竟然話帶兩隻嘩鬼落樓下剷吓雪。 喂! 老細, 我哋住condo唔使剷雪過喎! 比咗管理費有人會搞掂架啦! 好明顯你三隻嘢想出去玩雪。

我唔理你哋, 總之咪再冷親再玩病, 我唔想New Year Eve又再留係屋企"out"冬菇。

真係「雪」過天清, 藍天白雲啊! 但係又凍又大風。

呢pair反斗二人組終於一嚐心願比啊媽批準落樓下玩雪。

小公主仲企埋出馬路坐低埋。唉! 啲雪咁厚, 幾時至可以揸到架車。

阿女, 究竟你夠唔夠力拎起個剷架! 後面架車係完全被雪包住咗!

我哋位管理員哥仔究竟去咗邊樹? 下午四點你都未嚟剷雪, 小王子身後間屋, 人哋至少有條路仔比人行呀! 最後我家門前條路仔就係由我屋企三位偉大嘅老細剷出嚟嘅, 真係要比啲掌聲佢哋。