快樂為何物?

快樂為何物?

要用什麼方式來衡量快樂指數的高低? 想信每一個人都有不同的答案。

有人會答金錢財富最令人快樂, 有人會說事業有成才最重要, 有人話有愛才快樂, 有人見到美食就笑不合咀, 老人家見啲孫最開心, 各式其式......

但我好簡單, 只要一家人健康平安在一起, 我就滿足快樂。當然我唔係扮清高唔恨錢, 無錢萬萬不能呀, 無錢點去血拼, 無得購物, 無靚衫靚鞋, 無護膚品化妝品, 會令女人心理失控架!

但錢又唔可以買到一切喎!  親情健康就買唔到啦!

所以我好老土, 每年嘅新年願望, 生日願望都係同一個, 就係一家人健康平安。財富金錢我就當係上天比我嘅bonus, 因為我相信只要不怕捱苦, 肯用心去工作, 錢一定不缺, 但健康平安係要上天眷顧架!

好彩而家學識健康飲食, 咁就可以將健康捉緊啲, 再將老化推遲啲, 咁廿年後我仲可以健康美麗喎, 幾開心呀!

仲有乜嘢可以令我快樂呢?

就係見到愛我及我愛嘅家人老友都快樂, 咁我就快樂喇! 所以我最鍾意見到人開心。其實我好眼淺, 好易為別人快樂而快樂, 傷心而傷心。我睇電視劇睇到啲感動位都可以喊餐飽。

所以我自己成日笑, 我信笑多啲, 連運氣都好啲。我好怕見到人怨天怨地, 小小事就睇成天咁大。要快樂, 要笑口常開, 首先要學懂放下。學識凡事不強求不計較不怕蝕底易滿足, 再學識放下心中不快和仇恨, 你一定可以變成開心快樂人。

人之所以不快樂, 全因被心中不忿而折磨, 走進牛角尖、闖進死胡同裏。要去憎恨一個人係最愚蠢嘅事!

試想想, 去嬲一個人等於將佢變成內心一條刺, 一個包伏, 一生一世咁孭住係身。 我真係唔制呀!  咁咪即係揾自己笨, NO WAY。要我一生一世咁記住你, 你要好有分量至有機會囉!  我呢啲啊Q, 唔開心嘅事會自動delete, 瞓醒覺就失憶架啦! 開心嘅事至值得我去記住一生一世。

好似呢兩日病咗, 有咁多姊妹天使留言關心慰問, 呢啲先值得去記住!

「放下」是一件說易行難既事。

大家就由今天起訓練自己, 每當個頭開始出煙想發嬲時, 深呼吸幾下, 再諗諗值唔值得噴火先。只係諗到心情唔好, 不快樂會令人快啲老, 你就會即刻唔制, 再轉為笑。

EQ好精神好, 快樂美麗不易老。