我的另類興趣

上回講到因為個仔脫髮, 自己走去刨左幾本中醫藥既書, 咁究竟我仲有乜野書藉係因為個仔開始鑽研既呢?  仲要成為自己既另類興趣。各位姊妹估到未呀!

比少少貼士啦, 係我書架上, 除左有中草藥及食物水果大全, 仲有護膚, 財經, 八字風水及密宗既書, 係咪估到啦!

有護膚既書係因為呢個係我二十年來既與趣, 有財經既書, 因為我係讀accouting既, 做全職師奶前仲係一位股票經紀。

好喇, 答案已經出左黎, 係2004年為左個仔, 我竟然走去睇講八字既書, 睇下係無計可施既情況底下, 有冇另一種方法去幫個仔, 點知睇睇下又睇埋講風水既, 因為我所讀既八字風水書作者, 亦係一位密宗師傅, 連帶下近年連佢所寫既密宗作品都睇埋。

係咪估我唔到呢? 哈哈哈...

可能你會問, 咁究竟當年八字風水, 有冇野幫到我個仔, 可以講係有既。八字與風水方位係講五行, 而中醫理論亦講五行, 連不同食物亦有分五行屬性, 所以係有關連既。

好記得當年帶個仔第一次去睇, 醫好佢個位醫師, 佢就話好少見兩歲多既小朋友會"班禿", 把脈後就話佢陰虛內熱, 而飲左中藥個多月時, 醫師仲話點解我個仔入面仲係咁燥熱既! 

後來當我研究八字時, 發覺個仔五行屬水, 木月出生. 成個八字木火旺盛, 更缺金來生水, 木火旺人就自然燥兼缺水, 頭髮屬水, 冇水如何生木, 有趣既係那間中醫館名字有金又有木, 而那位醫師個名三個字都屬木, 連我都O晒咀, 咁"橋", 唔係麻!   所以有人話醫生與病人要講醫緣, 其實係五行作怪。

仲有當我開始睇有關風水既書, 又有大發現, 書中指有一小朋友頭部出現病變, 皆因家中東方二樓放左一台機器, 易經中東方為長子方位, 東方所有擺設都會影響長子。即刻令我想起個仔脫髮前一個月, 家中大廳東方裝左一台紅色吊扇, 加埋買左盆紅辣椒放在東方, 紅色跟辣椒屬火, 天花為頭部, 唔通真係咁攪到個仔熱到噴晒火, 嚇到我立即扔左盆辣椒, 拆埋把吊扇, 冇幾耐個仔真係開始生番D頭髮, 係呢一刻點到我唔信。

亦因為咁, 我對中國呢種古文化產生興趣, 覺得係一個寶藏, 研究左幾年都只係識少少唔敢扮代表, 但玄學就變成我既另類興趣。

但我仍是要講, 八字令你知命不等於認命, 命運仍在我們手上, 因我信種善因得善果, 多種善因, 可令人改變命運, 還有就是風水不是萬能, 佢只可以在你好運時錦上添花, 行衰運時雪中送炭。