萍果胡蘿蔔汁減肥

前天在圖書館見到一本由日本著名自然療法專家石原結實醫學博士所寫, 一本名為「萍果胡蘿蔔汁減肥」的書, 因之前聽Angel 講我地可以用連續兩天飲萍果胡蘿蔔西芹汁來進行排毒, 見作者又係自然療法專家, 所以借左返屋企慢慢睇, 發覺書中好多內容都似曾相識, 因為我係由Angel度學返來的。

 其中有一章講, 減肥先排毒, 體內毒素積聚大多會使新陳代謝減慢, 排泄量減少, 百病叢生, 代謝慢自然就易肥難瘦。亦有提及水分在體內儲存過多會變成水毒, 亦即中醫所講的「寒」。水分過多在體內亦會導致下半身發冷, 令熱、氣、血上升至上半身, 人就會不安,  失眠及產生焦躁感, 此為中醫所講的「水毒症」。


 有些過敏症就是由水毒症引致, 花粉敏感症為其中一種, 一睇到呢度即刻成個人彈起, 喂! 哇! 我呢排真係被花粉敏感症玩緊喎, 勁痛苦, 我平日又真係有水腫問題, 怪不得呢三晚浸完熱水浴後, 症狀好似有點舒緩啦!  書中指解決方法要多運動,  多出汗, 多喝紅糖生姜茶, 還要進行一名為「半日斷食減肥法」, 此法是早午餐只喝萍果胡蘿蔔汁, 晚餐正常飲食。莫非我都要試下?

 另外, 體內毒素積聚大多, 會令血液被污染, 自我淨化能力和排泄能力就會下降, 因而引發很多疾病。在開始排毒時會排出大量糞便、尿液和汗液。更會出現口內炎、生疹等情況, 有時會覺得病情惡了化, 因而不敢斷續排毒, 中醫稱此為「瞑眩反應」, 其實是疾病好轉的跡象。咦, 我差不多一個月前完成左21日酵精排毒療程, 咁我今季花粉敏感得超厲害(以前從未試過咁辛苦反應咁大) 同我之前排毒有冇關係呢？


 書內亦有講食物可分為陽性、陰性及中性, 什麼體質就要吃對應吃屬性之食物, 就如Angel 所講陰性肥胖的人要多吃溫熱性食物, 多浸浴來減肥。原來陽性體質人因體溫較高, 如吃過多陽性食物, 如鹽會引致高血壓。相反, 陰性體質人體溫較低及有水腫傾向, 就要攝取鹽分以排出多餘水份來提高體溫。嘩, 咁我咪做錯左, 我怕水腫, 所以平日唔敢食咁多鹽, 但我係陰性體質喎。


 體溫對減肥很重要, 體溫高代謝較高, 減肥自然易。 所以Angel 都有教我地要戒凍飲, 多浸鹽水浴及足浴來使身體溫暖, 加速血液循環及提高代謝。弊, 我仲未戒甩凍飲, 但經過連續三晚浸浴後, 開始感覺幾好, 浸完個人覺得鬆些又輕些。好, 等我浸多幾晚再跟各住姊妹分享下浸浴的好處。


 而作者所推廣的萍果胡蘿蔔汁能促進水循環, 有助排出毒素, 此萍果胡蘿蔔汁做法係將400克胡蘿蔔及250克萍果切成小塊用搾汁机搾出果汁, 此份量大概有兩杯半果汁, 每一個份量用作代替早餐及午餐, 即每次飲兩杯半。


 書中尾段亦有提及利用浸浴來加強此減肥法的效果, 作者跟Angel一樣說,如不方便浸浴, 也可通過足浴來排毒, 他更說連手浴也可以。最後一章更指出利用此萍果胡蘿蔔汁來改善三十多種不同疾病。


嘩, 好耐冇一次過寫咁多中文字, 因為我係用手寫板, 仲覺得自己好似做左一個讀書報告咁, N咁多年冇寫過。睇完呢本書, 令我覺得Angel所教我地既減肥養生法係work既, 各位想減肥既姊妹, 仲等咩呀!