物超所值

試左一個去死皮去角質層的產品, 叫 Bio-Fruit Exfoliator Gel 覺得效果好好, 想跟各位姊妹分享下。

之前有睇我其中一篇blog都知我試緊一個美白精華, 其實呢個美白精華香港都有得賣, 但幾貴下, 後來知道有朋友可向代理買到, 仲平好多, 咪試下啦!

女人天生愛貪小便宜, 我當然不例外, 見個friend有優惠價, 死唔蝕底, 發揮師奶既本色, 拎住份同牌子既product list, 左看右看, 睇睇仲有乜產品想試, 見到有個果酸去角質gel, 話有換膚效果咁話。咦, 呢個想試喎。

之前係美容院試左個什麼掃酸換膚facial, 要成美金75蚊一次, 點知冇料到, 完全唔多覺有效, 仲收我咁貴, 想死咩! 雖然係咁, 我個friend同我一齊做, 佢就甩皮甩都叫救命, 佢仲堅持做左三次, 最慘係甩完又唔覺塊面滑左。真失敗。

講番個隻果酸去角質gel先, 洗完面, 薄薄地塗一層在臉上, 等10-15分鐘, 其間因人而異,有人會有少許刺刺地的感覺, 我就只係覺塊臉的邊邊有小小拮拮地, 我老公同個妹就冇感覺, 夠鐘就可用暖水洗乾淨, 之後可以塗返平時用開的toner & cream。

洗乾淨後, 望住塊鏡, 發覺塊臉光亮精神左, 摸上去滑左, 感覺良好, 好過用磨沙膏, 個feel好乾淨, 用過幾次後, 發現用完即刻做番水份mask, 效果最好, 正呀, 真係有水潤潤 既感覺, 第二日上粉都貼D, 望下價錢, 可評分為物超所值!

我唔係hard sell, 只係試到好野想分享比大家知, 我D失敗個案勁多, 唔敢講詐, 陰公!

而家仲試緊隻眼睫毛增長液, 賣比我個鬼婆話4至6星期有效, 而家用到第三個星期, 未覺有效, 我諗又多一個失敗個案居多, 但我迫自己要用足6星期, 睇下掂唔掂, 我映左張before的相, 過多3星期, 再映張after相, 對比完再話你地知。