美麗係由內到外

我非常認同美麗係由內到外, 真係要做到"外敷內服", 雙管齊下至會靚得持久。

要靚, 除左平日做足皮膚護理外, 我很相信食療及多飲湯水滋補, 身體好皮膚自然靚, 那是由身體內散發出來的神采, 幾貴既護膚品都未必做到, 因為我親身經歷過。

講真我係一個唔多合格既主婦, 有時仲要比人寸係"無飯主婦", 我對煮野食既興趣真係唔大, 煮極都無乜大進步, 最多只係唔難食, 煮餐死仲要比個妹話冇heart, 不過好彩佢同我屋企幾位老細仲會讚下我的湯水掂。所以就算偷懶唔煮飯, 都一定要有湯比家人飲。所以好開心Angel 教我地煲瘦身湯, 又補身又瘦身既湯水, 正。

中國人既湯水梗用好多不同中藥材及煲湯料, 其實六年前既我, 沙參黨參花旗參都未分得清, 就係一件事令我讀左幾本中草藥既書, 對中草藥叫有番D常識。

事緣我的寶貝仔二歲多時, 突然脫髮, 學名叫"班禿"即係俗語所講既"鬼剃頭", 睇西醫只係叫你大力卒D類固醇藥膏係頭皮上, 但冇效, 繼續甩, 個位doctor既態度仲勁差, 最嚴重時九成頭髮唔見晒, 你話做阿媽既幾徬徨。

最後係朋友介紹下睇中醫, 每個weekend就去睇, 執五劑茶, 日日煲日日叫個仔飲, 好彩佢乖又肯飲, 最後好堅持咁飲左半年, 終於慢慢生番晒D頭髮出來。要堅持係因為身邊好多人叫我放棄, 飲黎多餘咁話。

你知喇, 日日係度煲中藥又唔知煲D乜, 又擔心個仔飲D唔知乜落肚, 唯有每次執茶, 偷偷地抄低D藥名再睇書了解下, 知識就係咁浸返黎。亦因為咁, 比我發現個仔對金銀花感敏, 有次個仔飲左劑茶後出紅點, 我睇番包藥, 見金銀花係唯一新加入去呢包茶度既草藥, 再同醫師講, 佢都話真係第一次放此草藥落去藥方中。

而家我好信中醫埋論, 但在紐約, 好中醫難尋, 醫好我個仔呢個年多之後又退埋休。

2008年中身体勁差, 貧血到要照胃照腸, 成個人好水腫, 個樣冇晒神采, 塗乜護膚品都無用,  勁沮喪。

 直到去年四月經一位老友介紹, 搵到一個掂既醫師, 幫我調理番好身體, 又用拔罐解決左我一半既水腫問題, 點解係一半, 因為九月佢已經告老還鄉, 返左中國, 就係咁我又冇人理, 對腳既水腫問題仍未解決晒, 但冇以前咁腫。

講到呢度, 想唔想知我為個仔, 除左睇中草藥既書之外, 仲研究埋邊類書藉呢? 你一定估唔到, 估下呀, 不過估中無獎, .哈...

下一篇開估話你知。