7月13日

今朝上磅數字係:  112.60

早餐(9:30):  暖水一抔. 火龍果一個

午餐(2:00): 雜菜生果沙律一碗, 豬仔包一個

Snack(6:00): 蜜糖水一杯 

晚餐(7:00): 雜菜生果沙律一碟, 煎豬扒一塊

    (8:30): 木瓜切粒一碗

忙左兩日, 終於有時間忙裏偷閑, 放低對仔女返學後, 走去做番個facial, relax下, 雖然美容師手勢麻麻地, 但點到叫清潔下呀! 做完facial之後落大雨, 走唔到, 見仲有時間, 咪嘆埋腳底按摩, 成3個月冇按過, 今次換左另一位女師傅, 佢仲問我想唔想留15分鐘做肩膊背按摩, 我諗住未試過, 都好喎!

點知有驚喜, 呢位女師傅力度剛剛好, 落位準確, 按肩膊背之後, 勁舒服, 超relax, 我諗下次有時間要book佢, 黎番個body massage至得啦! 係NY要搵一個掂既, 真係唔易。

家陣我去做facial都係帶私伙精華素及面膜粉比我個美容師做, 基本上佢手藝普通, 入既料又唔夠靚, 以住我成日比個friend話我, 掟錢落海兼浪費時間, 因為做完facial出黎個樣, 同未做前完全無分別。

後尾自己買些貴D既料比個美容師幫我做, 出黎既效果即時唔同, 連佢都要問我D貨係邊樹買, 但佢嫌貴囉。 手藝唔得就用靚料搭夠啦! 佢有冇諗過D客做來做去唔見效, 會走人呢!

如果美容師手勢好再加埋料靚, 做完個facial即時神采飛揚, 我試過一次, 就係去年返HK, 係Angel Face度做既個次facial, 勁掂!

其實係NY, 我仲識一個係HK學藝兼有廿幾年經驗既美容師, 用料普通但手藝很好, 做完facial會見到效果, 可惜佢勁hard sell各式各樣產品比你, 煩到我怕左佢。