兩日一夜大西洋城之旅

爛玩之家今次走左去新澤西州Atlantic City 東岸賭城嘆左兩日, 喪玩喪食, 樂而忘返, 我仲大膽到將宇宙神功扔埋一邊, 亂食一通。

要曳曳當然要付出代價, 今朝上磅, 肥左~~~

0.80磅

一磅未夠, 唔使驚, 乖乖重新修練宇宙神功, 加多兩日全日菜, 放心,呢一磅我好快會收服佢!

話時話, 五個月未試過連續兩日亂食一通, 其實個肚仔有D抗議, 滯滯地, 最衰冇心肝, 出去wet 都唔帶定D荷葉草本茶黎傍身消滯, C蠢。

好喇講番我地個喪玩喪食之旅。

禮拜日食完水果早餐, 10點出發, 首先去Jersey Garden Outlet。

你見我背心加短褲就知個日有幾HOT幾咁火辣辣, 係華氏97度!

~~~~~~~~~~~~~~~~~~~~~~~~~~~~~~~~~~~~~~~~~~~~~~

我係去左outlet, 但大家唔好誤會, 我冇亂買野shopping, 我只係佢買番樣好重要既野。 佢就係~~~

大鐘

唔好睇少佢呀! 我家成員木旺要補金, 屋企大廳個鐘壞左真係弊囉!

所以去玩之前, 路經此地, 入去買番個。

大鐘, 白色, 圓形, 歐洲羅馬字, 全部五行屬金, 0岩晒我心水, 仲要on sale, 原價$39.99, 特價15蚊, 點可以唔帶佢返屋企呢!

咦! 做乜變左係樹講風水五行, 轉番channel先!

買完野, 點知highway玩塞車, 平日兩小時車程, 變左三個幾鐘, 坐到腳痺!

做乜小王子拎住架smoothie blender 呢?

嘻~~~ 其實係賭場送既禮物! 以後可以自製健康smoothie啦!

Check-in 好, 拎左房, 放低行李, 兩隻馬騮第一時間梗係進行佢地最喜歡既活動

碧波暢泳!

游完水, 個個叫肚餓, 唯有火速沖涼, 再飛落去樓下食自助餐。

其實一開始我仲有宇宙既, 先黎大碟雜菜沙律, 再吃海鮮, 之後拮左honey個件牛扒, 試左一啖, 麻麻地, 所以冇掂。但最後我都係衰左, 食左澱粉。

咪衰左係佢地手上囉! 甜品係我C穴!

左邊個件係Banana Cake, 幾好味, 蛋榚鬆軟, 但我冇食D cream, 隔離個舊仔黑麻麻既係朱古力碎果仁brownie, 超濃朱古力味, 用黎嘆咖啡, 好正, 但勁肥, 所以只好淺嚐。

右邊個件係cheese cake, 但好難食, 超甜, 個味道唔知點解唔似cheese cake, 竟然似大白兔糖味, 搞邊科? 免得浪費quota, 只係試左一啖仔。

其他甜品, 唔係cream多就係醬多, 你睇小王子個件, 叫Oreo Cream Cake。

嘩! 真係好~~~CREAM呀! 怕怕, 咪搞我!

~~~~~~~~~~~~~~~~~~~~~~~~~~~~~~~~~~~~~~~~~~

食完buffet 先七點半, 出去海邊Broadywalk, 散下步, 消化下先!

後面係凱撒大賭場!

呢度係賣意大利 Ice既!

睇埋音樂噴泉演出, 先返酒店休息。

你睇小公主條露肩兼大露背裙, 幾sexy! 哈~~~

第二朝訓到十點至醒,

呢個係我既 late breakfast, Banana pancake。小王子食左個Banana 格仔餅。

又黎番張到此一遊!                                搞乜係樹扮cowgirl?

第二日下午出去行下, 再係game room hea下, 四點再去餐廳, 叫左兩份焗牛薄片三文治, 一人半份再加少少薯仔沙律, 已經飽到上心口。

原先諗住晚餐乖乖地返屋企吃沙律, 點知開車冇耐, 我個魔鬼阿妹call黎問我有冇嬴錢, 想我請佢食飯, Sorry, 我冇嬴不特止, 仲要放抵左幾兩。

佢話想食日式燒牛肉, 我乘機話你請客既話, 我地一家四口陪你吃, 佢好豪咁話出左糧, 食咪食囉!

就係咁, 我地飛車出Chinatown接左我地位老細, 再飛車上Midtown, 嘆日式燒牛肉, 今次見有特價仲試埋個Kobe和牛切粒及taro壽司, 正呀!

嘆完dinner, 見仲早, 咪鼠過隔離間小型日本超市逛下啦!

上次係blog友Puiying & Cheryl 個blog見佢地話綠茶介紹個隻芝麻salad dressing好正, 後尾我又係雜誌見佢賣廣告, 好想試, 逛狂下, 竟然比我搵到佢~~~

開心C我 , 係日版既, 得5.75安士, 要$3.99美金啊! 唔理咁多, 帶埋佢返屋企。

之後再返落Chinatown買雪榚食, 呢間雪榚店係唐人街好出名, 有好多口味, 綠茶,荔枝, 芒果, 薑味, 芋頭等等。但佢地又出名貴, 兼發現佢地又加左價, 我老公食得好肉赤。

哈~~~

最後我既兩日一夜喪玩喪食之旅, 就係我嘆住球荔枝味雪榚中結束喇!